«Astana Pro Team» veloshabandozdary úzdik nátıjege qol jetkizedi dep oılaımyn -Alekseı Lýtsenko
ALMATY. QazAqparat - «Astana Pro Team» veloshabandozdary Almaty týrynda jaqsy nátıje kórsetetinine senimdi. Bul týraly «Almaty týr» velojarysynyń eki dúrkin jeńimpazy Alekseı Lýtsenko «QazAqparat» tilshisine jarys bastalar aldyndaǵy suhbatynda aıtty.
«Búgin jańbyrly kúnge qaramastan bizdiń komandanyń ishinen joǵarǵy nátıjege jetetinder bolady dep oılaımyn. Ózderińiz bilesizder, velosport ol komandalyq oıyn, sondyqtan jeńiske jetsek, barlyǵymyzǵa jaqsy bolady», - dedi «Almaty týry» týrynyń basty favorıti Astana kásipqoı velokomandasynyń kapıtany Alekseı Lýtsenko.
Tanymal veloshabandoz Vıchentso Nıbalı úshin bul saıys «Astana Pro Team» komandasy sapyndaǵy sońǵy jarysynyń biri. Italııalyq sportshy da aýa raıyna qaramastan jaqsy nátıjege qol jetkizýge tyrysatynyn aıtty.
Aıta keteıik, búgin Almatyda saǵat 09-30-da «Almaty týry - 2016» velojarysy bastaldy. Veloshabandozdar Ál-Farabı dańǵyly boıymen jarysa otyryp, Mustafın kóshesimen ótip, Shyǵys aınalma jolynan keri burylady. Bir aınalym qashyqtyǵy - 31 shaqyrym. Jarys jolynyń jalpy qashyqtyǵy - 186 shaqyrym.
Eske sala keteıik, «Almaty týry» bıyl tórtinshi ret ótip jatyr. Alǵashqy ret jarys 2013 jyly bastalǵan. 2014 jyly UCI Halyqaralyq velosıpedshiler halyqaralyq odaǵy velojarysqa eń joǵarǵy dıvızıonnyń kásipqoı komandalary oınaıtyn 1.1 kategorııasyn berdi.
Velojarysqa Eýropa men Azııanyń 14 komandasy qatysady.
Velojarys álemniń eń iri «Eurosport» sport telearnasynda jáne Qazaqstannyń «Kazsport» arnasynan berilip otyr.
Velojarystyń jalpy júlde qory 39 myń eýro. «Almaty týrynyń» jeńimpazy 15 myń eýro, ekinshi jáne úshinshi oryndarynyń ıeleri 10 jáne 5 eýrodan alady. Sonymen qatar, 20-orynǵa deıingi qatysýshylar marapattalady.
