«Astana» prezıdenttik klýbynyń máselesi jaqyn arada sheshiledi - Arystanbek Muxamedıuly

ASTANA. QazAqparat - QR Mádenıet jáne sport mınıstri Arystanbek Muxamedıuly «Astana» prezıdenttik klýbyn qarjylandyrý máselesi boıynsha túsinik berdi, dep habarlaıdy QazAqparat tilshisi.

«Bárińiz jaqsy bilesizder, «Samuryq-Qazyna» qory «Astana» prezıdenttik klýbyn Mádenıet jáne sport mınıstrliginiń quramyna ótkizdi. Qazirgi kezde belgili bir túsinispeýshilik bar. Sportshylardyń jalaqysy tólenbeı jatyr, qarjylandyrý toqtatyldy deıdi. Iá, shynymen de, biz jaǵdaıdyń anyq-qanyǵyna jetkenshe qarjylandyrýdy toqtattyq. Ol jerde aqshanyń somasy óte úlken. Biz bolsaq, qarjynyń ashyqtyǵyn qalaımyz», - dedi A.Muxamedıuly keńeıtilgen alqa májilisinde.

Mınıstrdiń aıtýynsha, búginde «Astana» prezıdenttik klýbynyń qamqorshylyq keńesi qurylyp jatyr. Oǵan tanymal sportshylar, depýtattar jáne taǵy basqa azamattar kiredi.

«Men oılaımyn, sársenbi kúni biz qamqorshylyq keńesiniń alǵashqy jumysyn jarııalaımyz. Sonyń negizinde mınıstrlik klýbtar máselesimen aınalysady. Ondaı shara ne úshin kerek? Biz elimizdegi barlyq sport sharalaryn úılestirip, bir ǵana quziretti organ arqyly júrgize alamyz. Áıtpese, buryn biryńǵaı júıe bolǵan joq. «Samuryq-Qazyna» tikeleı aqsha aýdardy. Árıne, ondaıda ashyqtyq bolǵan joq. Qazir biraz suraqtar bar», - dep atap kórsetti A.Muxamedıuly.