«Astana» Prezıdenttik basketbol klýbyna úsh legıoner qosyldy
ASTANA. QazAqparat - «Astana» Prezıdenttik basketbol klýby bıyl 3 legıonermen, barlyǵy 6 oıynshymen tolyqty. Búgin elordada ótken baspasóz máslıhatynda klýbtyń jańa maýsymǵa daıyndyǵyna qatysty aıtyldy, dep habarlaıdy QazAqparat tilshisi.
Atap ótilgendeı, bıyl basketbol klýbynyń quramy jańa 6 oıynshymen tolyqty. Onyń úsheýi legıoner bolsa, qalǵan úsheýi qazaqstandyq sportshylar.
Atap aıtqanda, «Astana» klýby 26 jastaǵy amerıkalyq basketbolshy Djalıl Obraınmen (shabýylshy) bir jyldyq kelisimshartqa otyrdy. Bul Djalıldiń AQSh-tan tys, shetelde birinshi ret óner kórsetýi. Obraın kásibı karerasyn «ıÝta Djazdyń» farm-klýby - «Solt Leık Sıtı Starz» komandasynda bastaǵan (G-lıga). 2016 jyly «ıÝta Djaz» komandasynyń negizgi quramymen kelisimshartqa otyrǵan. 2017/2018 maýsymyn «Akva Kalıente Klıppers» komandasynda ótkizdi.
29 jastaǵy amerıkalyq taǵy bir kásipqoı basketbolshy Kennet Horton (shabýylshy) sporttyq mansabyn Frantsııada bastaǵan. Keıin Kıpr komandasy úshin oınaǵan. 2013/2014 jyldarǵy maýsymyn Meksıkadaǵy «Huracanes de Tampico» komandasynda, 2014/2015 maýsymyn kelisimshart negizinde Fınlıandııanyń «Kataja Basket» klýbynda ótkizgen.
AQSh-tan shaqyrylǵan úshinshi oıynsha Djeffrı Grosell (ortalyq shep oıynshysy) 25 jasta. Ol «Astana» PBK-men 2018/2019 jyldar maýsymyna bir jyldyq kelisimshartqa otyrdy. Buǵan deıingi eki maýsymdy Býndeslıgada ótkizgen.
Prezıdenttik basketbol klýbynyń sapyn tolyqtyrǵan qazaqstandyq jas sportshylar - Rýslan Aıtqalı (qorǵaýshy), Asqar Maıdekın (ortalyq shep oıynshysy)jáne Nıkolaı Bajın (qorǵaýshy).
Asqar - Qaraǵandy oblysynyń týmasy, ortalyq sheptegi áleýeti zor oıynshy. Qazirdiń ózinde Qazaqstan ulttyq quramasynyń sapyna tartylyp júr. Rýslan Aqtóbede týǵan, Almatydaǵy respýblıkalyq mektep-ınternatty bitirgen. «Astanaǵa» deıin «Almaty Legıony» klýbynda shabýylshy qorǵaýshy jáne jeńil shabýylshy shepterinde oınaǵan.
«Bizdiń jigitter jańa maýsymǵa daıyn jáne kezekti oıyn emes, nátıjeli oıyn kórsetetinimizge senimdimin. Basketbol kórermenderi men bizdiń klýb jankúıerlerine tartymdy oıyn kórsetýge ýáde beremiz. Jańa maýsymnyń kestesin kórgen bolsańyzdar, oıyn qarymdy komandamen bolaıyn dep tur. «TsSKA» Reseıdiń ǵana emes Eýropanyń úzdik komandalarynyń biri ekenin bárińiz bilesizder. Shynynymdy aıtsam, alǵashqy oıynda osyndaı azýly komandamen shyǵatyn bolǵandyqtan azdap qobaljý bar. Eki jaǵynan, bizde bir ǵana maqsat bar ol - jemisti oıyn kórsetip, pleı-offqa shyǵý. Nátıjeli oıynnan bólek, bizdiń maqsat Qazaqstandaǵy basketbol sportynyń qarqynyn kóterý. Osy turǵyda biz ulttyq quramamen qatar, aımaqtyq komandalarmen joldastyq kezdesýler ótkizip, qoldaý bildiremiz», - dedi «Astana» basketbol klýbynyń bas bapkeri Emıl Raıkovıch.
Aıta keteıik, VTB biryńǵaı lıgasynyń chempıonaty 2018 jyldyń 5 qazany men 2019 jyldyń 28 sáýiri aralyǵynda ótedi.
Bıylǵy dodaǵa qatysatyn 14 komanda eki aınalymdyq júıemen bir-birimen kezdesip shyǵady (óz alańynda jáne syrtta). Jyl saıynǵy dástúrge saı lıganyń 8 úzdik komandasy pleı-off satysynda baq synaý quqyǵyna ıe bolady. Jeńimpaz pleı-off oıyndary júıesimen anyqtalady.
Qazaqstan komandasy VTB biryńǵaı lıgasynyń chempıonatyndaǵy 6 maýsymnyń ishinde birneshe márte kópshilikti tánti etip, óz alańynda Eýropa basketbolynyń azýly komandalaryn tize búktirgen bolatyn. Atap aıtqanda, «Jalgırıs» jáne «Letývos-Rıtas» (Lıtva), «Býdıvelnık», «Donetsk» jáne «Azovmash» (Ýkraına), «Kalev» (Estonııa), «VEF» (Latvııa), «Nıjnıı Novgorod», «Krasnye krylıa», «Hımkı», «Avtodor» (Reseı).
«Astana» basketbolshylary 7 qazan kúni alǵashqy oıynda Máskeýdiń «TsSKA» komandasyn qabyldaıdy.
Eske salaıyq, «Astana» basketbol klýby «Samuryq-Qazyna» Ulttyq ál-aýqat qorynyń qoldaýymen 2011 jyldyń naýryzynda quryldy. 2013 jyly atalmysh klýb «Astana» Prezıdenttik kásipqoı sport klýbynyń quramyna endi. 2016 jyly onyń ataýy «Astana» Prezıdenttik basketbol klýby bolyp ózgerdi.
