Astana Pop Up Store: elordada alǵash ret jergilikti brendterdiń dızaın-festıvali ótedi
ASTANA. KAZINFORM — Eki kún boıy Qazaqstannyń ártúrli qalasynan kelgen 50-den astam brend kıim, aksessýarlar, zergerlik buıymdar, ınterer zattary, kosmetıka, turmysqa arnalǵan ónimder men avtorlyq jobalaryn usynady, dep habarlaıdy elorda ákimdiginiń resmı saıty.
Beıbitshilik jáne kelisim saraıynda 11-12 shilde kúnderi Astana qalasy ákimdiginiń jáne «Kreatıvti ındýstrııalardy damytý qory» korporatıvtik qorynyń qoldaýymen alǵash ret Astana Pop Up Store — sán, dızaın, gastronomııa, mýzyka men kásipkerlikti bir alańǵa toǵystyratyn jergilikti dızaınerlerdiń jańa qalalyq festıvali ótedi.
Uıymdastyrýshylar jergilikti brendter men zamanaýı qalalyq mádenıetke qyzyǵýshylyq tanytatyn birneshe myń elorda turǵyny men qala qonaǵy keledi dep kútedi.
Astana Pop Up Store jobasyn Qazaqstandaǵy jergilikti bıznes pen kreatıvti ındýstrııalardy qoldaıtyn eń tanymal bastamalardyń biri — Almaty Pop Up Store komandasy júzege asyrady.
Sońǵy jyldary bul joba qazaqstandyq brendterdiń jańa tutynýshylar tabýyna, ónimderin synaqtan ótkizýine jáne jańa naryqtarǵa shyǵýyna múmkindik beretin mańyzdy alańǵa aınaldy.
— Búginde jergilikti brendter Qazaqstannyń jańa mádenı jáne ekonomıkalyq kelbetin qalyptastyryp jatyr. Ónimderdiń sapasy, dızaın deńgeıi jáne kásipkerlerdiń ambıtsııasy artyp keledi. Astana Pop Up Store — brendterdi, satyp alýshylardy, seriktesterdi jáne jergilikti óndiristi qoldaıtyn jandardy toǵystyratyn kezdesý alańy, — deıdi jobanyń teń quryltaıshysy Madına Aman.
Dızaın-jármeńkede qonaqtarǵa qazaqstandyq óndirýshilerdiń dızaınerlik kıimderi men aksessýarlary, avtorlyq áshekeıleri, qoldan jasalǵan sabyn men kosmetıkasy usynylady.
Sonymen qatar bıoınjenerler men ónerkásiptik dızaınerlerdiń teńiz baldyrynan jasalǵan bylǵary, sańyraýqulaq negizindegi kóbik sııaqty ekologııalyq materıaldardan ázirlengen ınnovatsııalyq ónimderiniń prototıpteri tanystyrylady.
Festıval aıasynda gastronomııalyq aımaq, seriktesterdiń arnaıy jobalary men mýzykalyq baǵdarlama uıymdastyrylady.
Bas sahnada eki kún boıy Moldanazar, Asiya, Torearyq, Yez jáne Oyeleye óner kórsetedi. Іs-shara keńistigi jańa brendtermen tanysyp, olardyń avtorlarymen júzdesýge jáne qazaqstandyq kreatıvti ındýstrııadaǵy jańa esimderdi ashýǵa múmkindik beredi.
Astana Pop Up Store festıvaliniń elordada ótýi jergilikti óndiris pen zamanaýı qazaqstandyq dızaınǵa degen qyzyǵýshylyqtyń artyp kele jatqanyn kórsetedi. Joba shaǵyn bıznesti damytýǵa, otandyq brendterdi nasıhattaýǵa jáne qalalyq tutyný mádenıetiniń jańa úlgisin qalyptastyrýǵa arnalǵan turaqty alań qurýdy maqsat etedi.
Aıta keteıik, festıval 11-12 shilde kúnderi saǵat 12:00–den 20:00–ge deıin Beıbitshilik jáne kelisim saraıynda ótedi.
Buǵan deıin Astanada BaiQymyz-2026 halyqaralyq qymyz festıvali ótetinin jazǵan edik.
