Astana polıtsııasynyń kınologııalyq ortalyǵy tórt kúshikpen tolyqty
ASTANA. KAZINFORM — Elordalyq Polıtsııa departamentiniń Kınologııalyq qyzmet ortalyǵyna bolashaqta quqyq qorǵaý organdaryna qyzmet etetin tórt kúshik qosyldy, dep habarlaıdy Astana ákimdiginiń resmı saıty.
— Kúshikterdiń anasy — iz-túzsiz joǵalǵan adamdardy izdeýge mamandanǵan Hloıa Deıa atty qyzmettik belgııalyq ovcharka. Bul — onyń alǵashqy kúshikteri. Al kúshikterdiń ákesi — qyzmet barysynda talaı ret polıtseılerge esirtki zattaryn anyqtaýǵa kómektesken Baks atty qyzmettik ıt. Qazir kúshikterdiń týǵanyn eki aıǵa boldy. Olar ósip-jetilip, oınap, kún saıyn qamqorlyǵyna alyp otyrǵan kınolog mamandarǵa úırenip keledi. Jastary áli kishkentaı bolǵanyna qaramastan, aldaǵy qyzmetke jaramdylyǵyn anyqtaıtyn alǵashqy synaqtar bastalyp ta ketti, — deıdi tártip saqshylary.
Mamandar kúshikterdiń minez-qulqyn, belsendiligin, zeıinin jáne bolashaq qyzmetine qajetti ózge de qabiletterin baǵalaıdy. Al alty aıǵa tolǵan kezde budan da kúrdeli synaq kezeńi ótedi. Osynyń nátıjesinde ár kúshiktiń áleýeti anyqtalyp, qaı baǵytta daıarlanatyny belgilenedi.
Ázirge tórt bolashaq ıisshil ıt úshin oıyn oınap, kınologtardyń qamqorlyǵyn seziný mańyzdy. Al alda olardy jattyǵý, arnaıy daıyndyq jáne elorda turǵyndarynyń qaýipsizdigi jolyndaǵy jaýapty qyzmet kútip tur.
Bul Kınologııalyq qyzmet ortalyǵynyń búkil ujymy úshin úlken qýanysh. Kóp uzamaı kúshikter elorda polıtsııasynyń tórt aıaqty jaýyngerlerine aınalady.
Osyǵan deıin Qazaqstan aýǵan kınologterin oqytýǵa jáne ıisshil ıtter berýge daıyn ekenin jazǵanbyz.
