Astana polıtsııasy túkirgenderdi «uıat taqtasyna» shyǵardy
ASTANA. KAZINFORM — Elorda polıtsııasy turǵyndarǵa qoǵamdyq oryndarda tazalyqty saqtaý qajettigin eskertti. Bul týraly Astana qalasynyń ákimdigi málim etti.
Polıtsııa departamentiniń málimetinshe, jyl basynan beri kóshelerde, aıaldamalarda, saıabaqtar men aýlalarda qoqys, temeki tuqyldaryn tastaý, túkirý, avtokólik terezesinen qaldyqtardy laqtyrý jáne abattandyrý qaǵıdalary buzylǵany anyqtalǵan.
«Taza Qazaqstan» aktsııasy aıasynda jyl basynan beri 13 myń quqyq buzýshy anyqtalǵan.
— Mundaı áreketter qala kelbetine nuqsan keltirip qana qoımaı, turǵyndardyń sanıtarlyq jaǵdaıy men qaýipsizdigine de qaýip tóndiredi, — delingen habarlamada.
Quqyq buzýshylyqtardyń aldyn alýda Jedel basqarý ortalyǵynyń kameralary erekshe ról atqarady. Olar qorshaǵan ortany lastaý faktilerin naqty ýaqyt rejıminde tirkeıdi.
— Kameralardan alynǵan aqparat jedel túrde polıtsııanyń kezekshi jasaqtaryna jiberilip, quqyq buzýshylardy anyqtap, olardy ákimshilik jaýapkershilikke tartýǵa múmkindik jasaıdy, — dep eskertti polıtsııadan.
Sonymen qatar, turǵyndardyń belsendi azamattyq ustanymy da mańyzdy. Olar quqyq buzýshylyq týraly habarlap, qoǵamdyq mádenıetti saqtaýǵa úlgi kórsetedi.
— Polıtsııa tazalyq qaǵıdalaryn saqtamaý zańmen belgilengen jaýapkershilikke ákeletinin eskertedi. Qalanyń tazalyǵy — ortaq eńbek, al árbir azamat ózi ómir súrip otyrǵan ortanyń jaı-kúıine jeke jaýapty, — delingen ákimdiktiń habarlamasynda.
Polıtsııa mynadaı pýnktterdi eske saldy:
- qoǵamdyq oryndardy turmystyq qaldyqtarmen jáne temeki tuqyldarymen lastamaý;
- balalar men jasóspirimderdi erte jastan tazalyq mádenıetine baýlý;
- lastaý faktileri týraly qalanyń resmı arnalary arqyly habarlaý.
— Tek birlesken kúsh-jigerdiń arqasynda ǵana Astanany taza, jaıly ári ómir súrýge qolaıly qala retinde saqtaı alamyz, — delingen Polıtsııa departamentiniń úndeýinde.
Aıta keteıik, buǵan deıin Almatyda drondar qoqys tastap, túkirgen turǵyndarǵa eskertý jasaıtynyn jazdyq.
