Astanada qoǵamdyq qaýipsizdik 36 myńnan astam beınekameramen baqylanady
ASTANA. KAZINFORM – Astana qalasy Polıtsııa departamenti elorda kósheleri men qoǵamdyq oryndarynda quqyqtyq tártipti qamtamasyz etý jáne jedel ahýaldy turaqtandyrýǵa baǵyttalǵan uıymdastyrýshylyq-praktıkalyq is-sharalar keshenin júzege asyryp jatyr, dep habarlaıdy elorda ákimdiginiń resmı saıty.
2026 jyldyń alǵashqy úsh aıynyń qorytyndysy boıynsha elordada kámeletke tolmaǵandardyń qatysýymen 113 jol-kólik oqıǵasy tirkelgen.
– Oqıǵalardyń negizgi sebepteri – júrgizýshiler men jaıaý júrginshilerdiń jol qozǵalysy erejelerin saqtamaýy, jol qozǵalysy kezinde zeıinniń tómendeýi. Osyǵan baılanysty 2025-2026 oqý jylyna arnalǵan mektepke deıingi jáne bilim berý mekemelerinde balalardyń jol-kólik jaraqatynyń aldyn alýǵa baǵyttalǵan profılaktıkalyq is-sharalar jospary ázirlenip, iske asyrylyp jatyr, - dedi Astana qalasy Polıtsııa departamentiniń Qoǵamdyq qaýipsizdik basqarmasy bastyǵynyń orynbasary Erkin Janabil Kommýnıkatsııalar qyzmetinde ótken brıfıngte.
Ol óz sózinde jyl basynan beri jasóspirimder arasyndaǵy quqyq buzýshylyqtardyń aldyn alý jáne kámeletke tolmaǵandardyń quqyqtaryn qorǵaý maqsatynda 210-nan astam jergilikti reıdtik is-shara ótkenin aıtty.
Negizgi is-sharalardyń biri – 2026 jylǵy 26-28 naýryz aralyǵynda ótken «Túngi qaladaǵy balalar» jedel-profılaktıkalyq is-sharasy. Onyń barysynda túngi ýaqytta (saǵat 23:00-den 06:00-ge deıin) zańdy ókilderiniń erip júrýinsiz turǵyn úıden tys jerde bolǵan kámeletke tolmaǵandarǵa qatysty 230-dan astam quqyq buzýshylyq faktisi anyqtalǵan. Bul QR ÁQBtK-niń 442-baby 2-bóligine sáıkes, quqyq buzýshylyq bolyp sanalady. Máselen, 2026 jylǵy 27 naýryz kúni Saraıshyq aýdanynyń ýchaskelik ınspektory túngi ýaqytta kámeletke tolmaǵan ulynyń qaraýsyz júrýine jol bergen elorda turǵynyn ákimshilik jaýapkershilikke tartty.
Polıtsııa departamenti bóten múlikti qasaqana joıý jáne búldirý faktileriniń jolyn kesý jumystaryn kúsheıtti. 2026 jyldyń basynan beri QR ÁQBtK-niń 147-1-baby boıynsha 51 ákimshilik quqyq buzýshylyq tirkelip, 50 adam jaýapkershilikke tartyldy. Olardyń ishinde 38 adam ákimshilik qamaýǵa alynyp, 12 adamǵa aıyppul salyndy, bir is boıynsha óndiris toqtatyldy. Polıtsııa málimetinshe, osy kezeńde qalada shamamen 15 lıft pen 10 astam avtobýs aıaldamasy búlingen.
Elordada usaq quqyq buzýshylyqtarǵa «nóldik tózimdilik» qaǵıdaty sheńberinde QR ÁQBtK-niń 434-babynda kózdelgen usaq buzaqylyq faktileriniń joly belsendi túrde kesilýde. Jyl basynan beri 779 adam ákimshilik jaýapkershilikke tartylǵan (2025 jyly – 3555). Nátıjesinde, 366 aıyppul salynyp, 399 adam ákimshilik qamaýǵa alynǵan, 2 adamǵa qoǵamdyq jumystar taǵaıyndaldy. 12 materıal boıynsha is óndirisi toqtatyldy. Bul baǵyttaǵy jumys júıeli túrde jalǵasady.
– Qoǵamdyq tártipti qamtamasyz etý úshin kún saıyn ishki ister organdarynyń qyzmetkerleri men Ulttyq ulannyń áskerı qyzmetshilerinen 2,5 myńnan astam adam jumyldyrylady. Zamanaýı tehnologııalardy engizýge erekshe nazar aýdarylǵan.
Іshki ister mınıstrliginiń «Jappaı beınebaqylaý» jobasy aıasynda 2024-2028 jyldarǵa arnalǵan qoǵamdyq qaýipsizdikti qamtamasyz etý tujyrymdamasyna sáıkes, elordada 210 myńnan astam beınekamera ornatý kózdelgen. Qazirgi ýaqytta Jedel basqarý ortalyǵy men kezekshi bólimderge 36 myńnan astam kamera qosylǵan. Bul quqyq buzýshylyqtardy baqylaý deńgeıin edáýir arttyryp, jedel áreket etý tıimdiligin kúsheıtýge múmkindik beredi, - deıdi basqarma bastyǵynyń orynbasary.
Budan buryn Almatyda 186 myń beınebaqylaý kamerasy jumys istep turǵanyn habarlaǵanbyz.
