Astana polıtsııasy qyzmet ótkerýdiń kúsheıtilgen nusqasyna kóshti
ASTANA. KAZINFORM — Qoǵamdyq tártip pen qaýipsizdikti qamtamasyz etý, sondaı-aq, Astanada Shanhaı yntymaqtastyq uıymynyń sammıtin ótkizý kezeńinde quqyq buzýshylyqtardyń aldyn-alý jáne jolyn kesý maqsatynda polıtsııanyń jeke quramy qyzmet ótkerýdiń kúsheıtilgen nusqasyna aýystyryldy. Bul týraly Astana qalasy PD Baspasóz qyzmeti málimdedi.
«Kóshelerde jáne mádenı-buqaralyq is-sharalar ótkiziletin oryndarda qosymsha qaýipsizdik sharalary qabyldandy. Jasaqtar sany ulǵaıtyldy, beınebaqylaý kameralaryn paıdalaný arqyly vızýaldy baqylaý kúsheıtildi», — delingen habarlamada.
Qalaǵa kire beriste polıtsııanyń «Rýbej» statsıonarlyq beketteri jumys isteıdi, onda azamattardyń qujattary men kóliktegi tyıym salynǵan zattardyń bar-joǵy tekserilip jatyr.
«Avtojoldardaǵy qaýipsizdikti qamtamasyz etýge erekshe nazar aýdarylǵan. Delegatsııalardyń arnaıy kolonnalarynyń ótý kezinde elordanyń magıstraldyq kóshelerindegi qozǵalys ýaqytsha shekteletin bolady», — dep habarlady Astana qalasy PD Baspasóz qyzmeti.
Sonymen qatar, azamattardyń qalaǵa kirýi men shyǵýy boıynsha qandaı da bir shekteýler qarastyrylmaǵan.
Astana qalasynyń Polıtsııa departamenti elorda turǵyndary men qonaqtaryn qoǵamdyq tártipti saqtaýǵa, qaýipsizdikti qamtamasyz etý boıynsha qabyldanatyn sharalarǵa túsinistik tanytýǵa shaqyrady.
