Astana polıtsııasy jol erejesin 555 ret buzǵan kólik ıesin izdestirýde
ASTANA. QazAqparat - Astana joldarynda júrgen 30 júrgizýshiniń aıyppuly mıllıondaǵan teńgeni qurady. Olardy polıtsııa izdeýde. Aıyppuldardyń jalpy somasy 106 858 960 teńgeni qurady, dep habarlaıdy QazAqparat Elorda Info saıtyna silteme jasap.
Eń kóp aıyppul - 6 225 405 teńge. Ol Kia Rio jáne Škoda markaly eki avtokólikke bir nómir taǵyp alǵan júrgizýshige tıesili. Aıta ketsek, Comfort sanatyndaǵy Kia Rio kóliginiń quny 2018 jyly 5,7 mln teńgeni, al Škoda Rapid Ambition-nyń 2019 jylǵy baǵasy 6 mln 290 myń teńgeni qurady. Mashınalardyń ıesi jolda júrý erejesin 555 ret buzǵan.
«Astanalyq Polıtsııa departamenti ótken jyldyń sáýir aıynan bastap «Boryshker» jedel-aldyn alý is-sharalaryn ótkizdi. Olardyń sheńberinde qala aýmaǵynda, sondaı-aq barlyq «Rýbej» beketterinde kólik aǵynyn baqylaýdyń avtomatty júıesin, elektrondyq planshetterdi jáne «Sergek» apparattyq-baǵdarlamalyq keshenin paıdalana otyryp, ákimshilik aıyppul boıynsha boryshkerler anyqtaldy. Jedel-aldyn alý is-sharalaryn ótkizý kezinde bazada joq, jalǵan nemese sheteldik nómirler men jalǵan mekenjaı kórsetilgen 800-ge jýyq júrgizýshi toqtatyldy», - delingen «Astana Innovations» AQ-nyń baspasóz habarlamasynda.
Qazirgi tańda qalalyq Polıtsııa departamenti jalǵan nemese sheteldik nómirlermen júretin jáne ózin jazasyz sezinetin tártip buzýshylardy anyqtaýda.
Astanada ótkizilgen keshendi is-sharalardyń arqasynda jol-kólik oqıǵalarynyń sany - 15%, jol apattarynda zardap shekkenderdiń sany - 16% jáne joldardaǵy ólim-jitim 48% azaıdy.
