Astana polıtsııasy meıramhanalardy aldaǵan «klıentterge» izdeý saldy
ASTANA. QazAqparat - Astana ІІD qylmystyq polıtsııa basqarmasy birneshe meıramhanalar men qonaqúılerdiń basshylyǵyn telefon arqyly aldap soqqan alaıaqtardy izdestirip jatyr, dep habarlaıdy «QazAqparat» HAA tilshisi departamenttiń baspasóz qyzmetine silteme jasap.
Polıtseılerdiń sózine qaraǵanda, kúdiktiler meıramhanalarǵa habarlasyp, úlken banketterge tapsyrys bergen. Ádeıi assortımentten tabylmaıtyn qymbat, sırek kezdesetin ishimdikterdi qoıýyn suraǵan.
«Araǵa ýaqyt salyp, «klıent» ákimshige spırtti ishimdikterdi ózi alǵanyn aıtyp, araq-sharaptyń aqshasyn kıvı-ámııanǵa jibere salýyn usynyp, sodan keıin banket úshin tolyq eseptesetinine sendiredi. Jábirlenýshiler alaıaqtardyń qarmaǵyna qalaı túsip qalǵanyn bilmeı de qalǵan», - deıdi tártip saqshylary.
Polıtseıler quqyqbuzýshylardy izdestirýde. QR Qylmystyq kodeksiniń 190-babyna («Alaıaqtyq») sáıkes sotqa deıingi tergep-tekserý bastaldy.
«Astana qalasy ishki ister departamenti qala turǵyndaryn saqtyqqa shaqyrady. Osy taqylettes faktiler jaıly bilgenderińiz bolsa, «120-ǵa» habar berińizder», - deıdi ІІD.
