Astana polıtsııasy iri kólemde aqsha urlaýy múmkin kúdiktini ustady
ASTANA. QazAqparat - Elorda polıtseıleri qonaq úılerdiń birinen iri kólemde aqsha urlaýy múmkin kúdiktini ustady. Bul aqparat Astana qalalyq polıtsııa departamentiniń Feısbýktegi paraqshasynda jarııalandy dep habarlaıdy QazAqparat tilshisi.
Vedomstvonyń málimetinshe, 29 jastaǵy qala turǵyny polıtsııaǵa júginip, qonaq úılerdiń birinde belgisiz adamnyń ishinde 1,5 mln teńgesi bar jolqapshyǵyn urlap ketkendigine shaǵymdanǵan.
Jábirlenýshiniń sózinshe, ol jolqapshyǵyn ústelge qoıyp, birneshe mınýtqa bir jerge shyǵyp ketken. Qaıtyp kelgende zatynyń joǵalǵanyn bilgen.
«Saryarqa» aýdandyq polıtsııa basqarmasynyń krımınaldyq polıtsııa qyzmetkerleri júrgizgen jedel izdestirý sharalary barysynda beınebaqylaý kamerasynyń kómegimen urlyq jasaǵan kúdikti anyqtalyp ustaldy. Kúdikti 46 jasar er adam bolyp shyqty. Ol Astana qalasy PD Ýaqytsha ustaý ornyna qamaldy. Atalǵan fakti boıynsha QR Qylmystyq kodeksiniń «Urlyq» babymen sotqa deıingi tergep-tekserý amaldary júrgizilýde. Kúdiktiniń osyǵan uqsas urlyqtarǵa qatysynyń bar-joǵyn tekserý jalǵasýda», - dep atap ótti departament ókilderi.
Astana qalasynyń polıtseıleri azamattardy saq bolýǵa shaqyrady. Sebebi qoǵamdyq oryndardaǵy quqyq buzýshylyqtyń eń kóp taraǵan túri «qalta urlyǵy» men jeke múlikterdi urlaý bolyp otyr.
«Osyǵan oraı azamattardy qyraǵy bolýǵa, óz múlikteriniń saqtalýyn qadaǵalap, jeke zattaryn qaraýsyz qaldyrmaýǵa shaqyramyz. Atalǵan adamnyń zańǵa qaıshy jasaǵan áreketteri týraly qandaı da bir qosymsha aqparatty biletin adamdar bolǵan jaǵdaıda «Saryarqa» aýdany PB-ǵa (Aqbuǵy kóshesi, 2), 8(7172) 71-66-14, 71-66-76, 71-60-69 nemese 102 telefondaryna habarlasýlaryn suraımyz», - delingen taratylǵan aqparatta.
