Astana polıtsııasy esirtki satýshylardyń jalpylama portretin jasady

ASTANA. QazAqparat – Astananyń esirtki qylmysyna qarsy is-qımyl basqarmasynyń bólim bastyǵy Sergeı Ilınyh esirtki satýshylardyń portretin sıpattap berdi, dep habarlaıdy QazAqparat tilshisi.

«Ádette, mundaı qylmysqa 17-35 jas aralyǵyndaǵy adamdar tartylady. Ásirese basqa qaladan kelgender. Olar aqsha tabý maqsatynda keledi, biraq ózderine laıyqty jumys taba almaı, elorda aýmaǵynda esirtki óndirý men taratý qylmysyna barady», - dedi Sergeı Ilınyh Esil aýdandyq polıtsııa basqarmasynda ótken brıfıngte.

Aıta keteıik, elordada «Qarasora-2022» jedel aldyn alý sharasy kezinde esirtkige qatysty 358 quqyqbuzýshylyq tirkeldi.

130 kelige jýyq túrli esirtki, onyń ishinde 54 keli marıhýana, 61 keli gashısh jáne 14 kelige jýyq sıntetıkalyq esirtki zańsyz aınalymnan shyǵaryldy.

Sonymen birge, 1 maýsym men 31 qazan aralyǵynda elordada esirtki satýdyń 60 jaǵdaıy tirkelgen.