Astana polıtsııasy elimizde zańsyz júrgen sheteldikterdi anyqtady
ASTANA. 15 mamyr. QazAqparat - Astana qalasynda 13-i men 17 mamyr aralyǵynda elorda aýmaǵynda zańsyz júrgen adamdardy anyqtaý maqsatynda «Zańsyzdyq» shuǵyl-aldyn alý is-sharasy ótkizilýde, dep habarlaıdy qalalyq ІІD-niń baspasóz qyzmeti.
«Reıdtik is-sharalar kezinde polıtsııa qyzmetkerleri 631 ákimshilik quqyq buzýshyny anyqtap, 597 sheteldikti, 27 Qazaqstan Respýblıkasynyń azamatyn, sheteldik jumys kúshin zańsyz paıdalanýshy 7 jumys berýshini ákimshilik jaýapkershilikke tartty», - delingen habarlamada.
astana.kz saıtynyń jazýynsha, 62 sheteldik jeke basyn anyqtaý úshin Astana qalasynyń qabyldaý-bólý mekemesine ýaqytsha ornalastyrylǵan. 55 sheteldiktiń Qazaqstan Respýblıkasynda bolýyna negiz bolmaǵandyqtan, ýaqytsha bolý merzimi qysqartyldy.
Sonymen qatar, kóshi-qon zańyn qasaqana buzǵan úsh sheteldikke qatysty qylmystyq is qozǵaldy.
Máselen, kóshi-qon polıtsııasy qyzmetkerleri Reseı Federatsııasy azamatynyń Astana qalasynyń 22.02.2013 jylǵy qaladan shyǵarylýy jónindegi ákimshilik soty sheshimin oryndamaǵanyn anyqtady.
Taǵy bir qylmystyq is Ózbekstan azamatyna qatysty memlekettik shekaradan qasaqana zańsyz ótkeni úshin qozǵaldy.
Sondaı-aq, is-sharalar barysynda polıtsııa qyzmetkerleri buryn izdeýde júrgen eki qylmyskerdi ustady.
