Astana polıtsııasy avtobazarlardan kóptegen urlanǵan zattar tapty
ASTANA. QazAqparat - Astana polıtsııasy «Kóktal» jáne «Tıtan» avtobazarlarynyń aýmaǵyn tekserip jatyr, dep habarlaıdy QazAqparat.
«Qazirgi tańda «Satyp alý» jedel-profılaktıkalyq is-sharalar Astana qalasyndaǵy avtobólshekter alyp-satatyn eki iri bazarda ótip jatyr. Bizdiń maqsatymyz - qoldanylǵan avtobólshekterdi satyp alýǵa jáne satýmen aınalysatyn kásipkerlerge urlanǵan zatty satyp alý týraly jaýapkershilikti uǵyndyrý. Olarmen jumys jasalyp jatyr», - dedi QazAqparat tilshisine Astana qalalyq ІІD krımınaldyq polıtsııa bastyǵy Dmıtrıı Demıdov.
Onyń aıtýynsha, kásipkerlerge satýshynyń qujattaryn skanerleý arqyly satýshynyń jeke basyn anyqtaý qajettiligi týraly keńester berilip jatyr. Osy keńesterge sáıkes, kóshirmede onyń qashan jáne neni satyp alǵany kórsetilýi tıis.
«Biz kásipkerlerdiń esine túsire almaǵan nemese osy zattardyń ıesin kórsete almaǵan zattaryn tárkiledik. Bizde kóptegen zattardyń urlaný faktileri bar. Osy jaǵdaıda eki taraptyń - zardap shegýshiniń de, kásipkerlikpen aınalysýshynyń da múddelerin qorǵaýǵa tıispiz», - dedi polıtseı.
Sondaı-aq, ol tergeýdiń kásipkerdiń taýarlarynyń ishinen urlanǵan zattar anyqtalǵan jaǵdaıda ǵana júrgiziletinin túsindirdi.
