Astana polıtsııasy ákimshilik buzýshylyq úshin 7 mlrd teńge aıyppul salǵan

ASTANA. QazAqparat – Astana polıtsııasy jyl basynan ákimshilik quqyq buzýshylyq úshin turǵyndarǵa 7 mlrd teńge aıyppul saldy, onyń 5 mlrd teńgesi óndirilip alyndy. Bul týraly elorda polıtsııa departamentiniń basshysy Marat Tólebaev málim etti, dep habarlaıdy QazAqparat tilshisi.

«Qorǵaý» mobıldik qosymshasy iske qosylǵaly jalǵan kólik nómirin paıdalanǵan – 84, júrgizýshi káýligi joq – 395 jáne kólikti basqarý quqyǵynan aıyrylǵan 169 júrgizýshi anyqtaldy. 681 kólik kommýnaldyq turaqqa qoıyldy. Odan bólek, 50 myńnan astam júrgizýshige ákimshilik quqyq buzýshylyq boıynsha 656 mln teńge soma kólemindegi bereshegi týraly habarlandy», - dedi Marat Tólebaev Astana qalasy máslıhatynyń otyrysynda.

Polıtsııa departamenti basshysynyń aıtýynsha, abattandyrý erejelerin buzǵan 13 259 azamatqa 42,5 mln teńge kóleminde aıyppul salyndy.

«Qorshaǵan ortany qorǵaý salasy boıynsha 477 quqyq buzýshy ákimshilik jaýapkershilikke tartyldy. Jalpy jyl basynan beri 760 840-tan astam ákimshilik quqyq buzýshylyq anyqtaldy. Nátıjesinde 7 mlrd teńge kóleminde aıyppul salynyp, onyń 5 mlrd teńgesi óndirildi», - deıdi ol.