Astana polıtseılerin kásibı merekesimen quttyqtady (FOTO)
ASTANA. QazAqparat - Búgin Astana qalasy Іshki ister departamentinde basshylyq, jeke quram men ishki ister organdarynyń ardagerleri qatysýymen qazaqstandyq polıtsııa kúnine arnalǵan saltanatty is-shara bolyp ótti.
Elordalyq ishki ister departamentiniń bastyǵy, polıtsııa general-maıory Amantaı Áýbákirov quttyqtaý sóz sóıledi.
Óz sózinde ol tártip saqshylaryn kásibı merekelerimen quttyqtap, olardyń denderine saýlyq, qyzmetterine qajymas qaırat pen tózimdilik tiledi, sonymen qatar, Aqtóbedegi lańkestik kezinde qaza tapqan Ulttyq ulan áskerı qyzmetshileriniń otbasylaryna erikti túrde materıaldyq kómek kórsetýge qatysqan jeke quramǵa alǵysyn bildirdi, dep habarlady Astana ІІD baspasóz qyzmeti.
Ardagerler keńesiniń tóraǵasy Esim Tanabergen de quttyqtaý lebizin bildirdi. «Sizder qyzmetterińizdi ar-abyroımen atqaryp, elorda aýmaǵyndaǵy tártiptiń saqtalýyn qatań baqylap, azamattardyń zańdy quqyqtary men múddelerin qorǵaýdasyzdar. Osy jaýapty iste sizderge tabystar tileımin», - dep atap ótti ardager.
Dástúrge aınalǵan Qazaqstan polıtsııasy kúni qyzmette erekshelengen qyzmetkerler medaldarmen, QR Іshki ister mınıstriniń gramotalarymen jáne alǵys hattarmen marapattaldy.
Sonymen qatar, 22 maýsymda Qazaqstan polıtsııasy kúni men Memlekettik qyzmetkerler merekesi qarsańynda Q. Muńaıtpasov atyndaǵy stadıonda qalalyq Іshki ister departamenti men Astana qalasy əkimdiginiń qyzmetkerleri arasynda fýtboldan jarys ótti.
