Astana polıtseıleri úshinshi qabattan qulap ketý qaýpi týyndaǵan eki búldirshindi qutqaryp qaldy
ASTANA. QazAqparat - Astanada qalalyq ІІD Jergilikti polıtsııa qyzmeti jol-patrýldik polıtsııa polkiniń qyzmetkerleri polıtsııa aǵa serjanty Qaırat Tiltaev pen polıtsııa serjanty Serik Qaıdarov jataqhananyń úshinshi qabatynan terezeden qulap ketý qaýpi tóngen úsh-tórt jastaǵy balalardy aman alyp qaldy.
Astana ІІD baspasóz qyzmetinde habarlaǵandaı, 19 aqpanda saǵat 16-larda patrýldeý kezinde polıtseıler úshinshi qabattyń tar erneýinde kele jatqan eki balany baıqap qalady. Balalardyń kez kelgen sátte qulap ketýi múmkin ekendigin kórgen polıtseılerdiń biri tereze astynda qalyp, olardy ishke kirýge úgittegen. Sátin salǵanda olar aıtqanǵa kóngen. Osy kezde ýaqyt joǵaltpaı ekinshi polıtseı jataqhana ǵımaratyna kóterildi.
Artynsha, polıtsııa qyzmetkerleri balalardyń ata-anasymen jáne jataqhana turǵyndarymen búldirshinderdi qaraýsyz qaldyrmaý jaıynda áńgimelesti.
Budan basqa, olar qaýipsizdik tehnıkasy týraly nusqama júrgizdi. Jataqhana ákimshiligi keleshekte osyndaı keleńsiz jaǵdaılardy boldyrmas úshin terezelerdi arnaıy qorǵanys jabdyqtarymen nyǵaıtty.
