Astana polıtseıleri toıdaǵylardy tonap ketken «qonaqty» izdestirip jatyr
ASTANA. QazAqparat - Astana qalasynyń Іshki ister departamenti bóten adamdardyń toıyna kelip, quddy óz toıynda júrgendeı bı bılep, sońynda eki adamnyń uıaly telefonyn urlap ketken jigitti izdeýge kiristi. Bul týraly QazAqparat tilshisine Astana qalalyq Іshki ister departamenti baspasóz qyzmetiniń jetekshisi Sofıa Qylyshbekova habarlady.
Astanadaǵy urlyqtyń jańa túri týraly Instagramm áleýmettik jelisindegi «v_astane» atty pablık habarlap otyr.
«Astana turǵyndarynyń nazaryna. 01.10.16 jyly bóten adamnyń toıyna kelip, óz toıynda júrgendeı qydyrǵan myna jigitke izdeý salamyz. Toı ıeleriniń bári ony bireýdiń týysy shyǵar dep oılady. Kesh boıy kóńil kóterip, jas jubaılar úshin qatty qýanyp júrdi. Toıdyń sońynda 2 adamnan «bireýge qońyraý shalyp alaıynshy» dep uıaly telefondaryn alǵan da, taıyp turǵan. Toıǵa kelgen adamnyń qarasy kóp boldy, basqa zardap shekken adamdar da bar shyǵar. Toıdan qalǵany onyń «kóńildi» sýretteri ǵana. Bul jigitti óz toıyńyzda kórseńiz, habarlasýyńyzdy suraımyz. Árıne, ol uıaly telefonyńyzdy alyp ketpese...», - dep jazǵan post ıesi.
Al, Astana qalasynyń Іshki ister departamentine ázirge eshkim urlyq týraly aryz túsirmegen eken. «Biraq, áleýmettik jelilerden kórip, aryz túspese de, urlyq faktisi boıynsha tergeý bastaldy. Bul jigittiń aty-jónin, qaı toıda urlyq jasaǵanyn, basqa da qylmystyq isterge qatysy bar ma, joq pa, anyqtaýǵa kiristik», - dedi S.Qylyshbekova.
