Astana polıtseıleri saıası qýǵyn-súrgin qurbandaryn eske alý sharasyn ótkizdi
STANA. Mamyrdyń 28-i. QazAqparat - Mamyrdyń 31-i - Saıası qýǵyn-súrgin qurbandaryn eske alý kúni. Osyǵan oraı Astana qalalyq ІІD-niń memlekettik til jáne aqparat bólimi Jol polıtsııasy basqarmasy qyzmetkerlerimen birlesip, saıası qýǵyn-súrgin qurbandaryn eske alý sharasyn ótkizdi.
Astana qalalyq ІІD memlekettik til jáne aqparat bóliminiń taratqan aqparatyna qaraǵanda, atalǵan rásimge saıası qýǵyn-súrgin qurbandary, olardyń balalary, sondaı-aq ishki ister organdarynyń ardagerlerleri men jas qyzmetkerleri qatysqan. Іs-shara barysynda memorıalǵa gúl shoqtaryn qoıǵan ardagerler men qyzmetkerler saıası qýǵyn-súrgin kezinde sheıit bolǵan bozdaqtardy bir mınýt únsizdikpen eske aldy. Osydan keıin olar azap jyldardyń esteligin kóz aldyńa ákeletin eksponattar qoıylǵan murajaıdy aralady.
Sharaǵa qatysqan Astana qalalyq ІІD Ardagerler keńesiniń tóraǵasy Esim Káribaev «10 jyl boıy turaqty atalyp ótiletin bul kún tarıhta máńgilik qalady. Osyǵan baılanysty Astana qalasynan 30 shaqyrym jerde ornalasqan Aqmol aýylynda Saıası qýǵyn-súrgin qurbandaryn eske alýdyń memorıaldyq-murajaı kesheni qurylǵan bolatyn. Dál osy jerdegi lagerde halyq jaýlarynyń jubaılary, 30 myńdaı áıel jazasyn ótedi. Ókinishke oraı, ulttyń azattyǵy jolyndaǵy is-áreketteri úshin nebir zulmat pen adam tózgisiz azap kórgen bozdaqtar qazirgi tańda aramyzda neken-saıaq», dep atap ótti.
