Astana polıtseıleri sábı urlaǵan áıeldi «izin sýytpaı» áshkereledi
ASTANA. 27 maýsym. QazAqparat - Elordalyq polıtseıler bireýdiń emshektegi sábıin urlaǵan áıeldi «izin sýytpaı» áshkereledi, dep habarlaıdy elordanyń resmı saıtynan qalalyq ІІD baspasóz qyzmetine silteme jasap.
26 maýsymda elordalyq Іshki ister departamentine Astana turǵyny shaǵym túsirdi. Er adam óziniń eki aılyq qyzyn belgisiz áıeldiń urlap ketkenin habarlady.
Bolǵan oqıǵany búge-shigesine deıin tyńdaǵan Astana qalasynyń Uıymdasqan qylmyspen kúres jónindegi basqarma qyzmetkerleri (UQQB) zardap shegýshiniń zaıyby baǵyttaǵy avtobýsta bir áıelmen tanysqandyǵyn anyqtady. Sóz arasynda zardap shegýshiniń áıeli ekinshi áıelge óziniń turmys jaǵdaıynyń qıyndyǵyn, "qysqa jip kúrmeýge kelmeı júrgendigin" aıtyp, shaǵymdanady. Oıynda esh kúdik joq aqkóńil áıel beıtanysqa kúıeýi ekeýiniń bes balasy barlyǵyn, jaqynda altynshy qyzy dúnıege kelgendigin de jaıyp salady.
Beıtanys áıel óz kezeginde, osy áńgimeni muqııat tyńdap alyp, óziniń kómekteskisi keletinin aıtyp, olarǵa qonaqqa barady. Kópbalaly otbasy turatyn vagon bólmege kirýge ruqsat suraıdy. "Men aýqatty adammyn sizderge kómek beremin" dep aldaýsyratady.
Keıin tergeý kezinde málim bolǵanyndaı, áıeldiń «kómek berem» degende aram oıy bolǵany anyqtaldy. Ol da sábıli bolýdy armandap júrgen jan eken. Ońtaıly sátti paıdalanyp, eki aılyq qyzdy urlap ketedi.
Qoldy bolǵan sábı men urlyq jasaǵan áıeldi tabý úshin polıtsııa qyzmetkerleri shuǵyl sharalar qoldandy. Kóp ýaqyt ótpeı-aq áıel qolǵa tústi. Qundaqtaýly sábı din aman. Ata-analaryna qaıtaryldy.
Jaýap alý barysynda áıeldiń jeke basyna qatysty málimetter de anyqtaldy. Ol 1984 jyly týǵan Aqmola oblysynyń turǵyny bolyp shyqty. Astanaǵa jaqynda kelgen, páter jaldap turady.
Atalǵan fakti boıynsha qylmystyq is qozǵaldy. Ustalǵan áıel Astana qalasy ІІD ýaqytsha ustaý ızolıatoryna qamaldy.
Tergeý júrgizilýde.
