Astana polıtseıleri profılaktıkalyq esepte turǵan tulǵalardy jiti tekserýde
ASTANA. 2 qarasha. QazAqparat /Gúlmıra Álıakparova/ - Astanada ótip jatqan «Esep» jedel-aldyn alý sharasy barysynda bir táýlikte 1 myńǵa jýyq adam tekserilip,
98-i túrli quqyq buzýshylyqtar úshin ákimshilik jaýapkershilikke tartyldy. Bul týraly búgin ótken baspasóz máslıhatynda qalalyq Іshki ister departamenti Qoǵamdyq qaýipsizdik basqarmasy bastyǵynyń orynbasary Qýantaı Omarbekov málim etti.
Q.Omarbekovtyń aıtýynsha, 1-5 qarasha aralyǵynda ótetin jedel-aldyn alý sharasyna polıtsııanyń qosymsha kúshteri men quraldary jumyldyryldy. Ony ótkizýdegi basty maqsat - elorda aýmaǵynda quqyq buzýshylyqtardyń aldyn alý, olardy týǵyzatyn sebepter men jaǵdaılardy joıý, qylmyskerlikti eskertý, quqyq buzýshylardy esepke alý jáne olarǵa zańdy sharalar qoldaný.
«Astana qalasy ІІD-niń profılaktıkalyq esebinde 4 myńnan astam adam tirkeýde tur, olardyń 536 -sy - kámeletke tolmaǵandar. Shara bastalǵan bir táýliktiń ishinde 968 adam tekserildi, onyń ishinde 104-i - kámelettik jasqa tolmaǵandar. Sondaı-aq, 109 tulǵa profılaktıkalyq esepke jańadan alynyp, 4-i ákimshilik qadaǵalaýǵa alyndy», - dep atap ótti ol.
Bir kúniń ishinde profılaktıkalyq esepte turǵan 98 adam ártúrli dárejedegi buzýshylyqtar úshin ákimshilik jaýapkershilikterge tartyldy, ıaǵnı olarǵa eskertýler jasalyp, aıyppuldar salyndy. Sonymen birge, merziminen buryn shartty túrde bosatylǵan eki azamattyń isi sotqa qaıta joldandy. Tártip saqshylary ákimshilik qadaǵalaýda turǵandarǵa baqylaýdy túngi mezgilde de júrgizetin bolady.
