Astana polıtseıleri planshet arqyly aıyppul sala bastady

ASTANA. QazAqparat - QR Bas prokýratýrasy Quqyqtyq statıstıka jáne arnaıy esepke alý komıtetiniń tóraǵasy Baǵdat Mýsın óziniń Feısbýktegi paraqshasynda jańa formatta jumys istep júrgen elordalyq polıtseıler týraly beınerolıkti jarııalady, dep habarlaıdy QazAqparat.

«Ótken beısenbiden bastap Astanada polıtseılermen birge joldarda E-aıyppul júıesin testileýden ótkizip jatyrmyz. Komıtet tarapynan daıarlanǵan atalǵan júıe polıtsııa qyzmetkerlerin qaǵazbastylyqtan  bosatýǵa negizdelgen. Komıtet prokýrorlary polıtsıleılermen birge qalany birge aralap, planshetterdiń jumysyn baqylap júr. Osy oraıda júıeniń jumysy egjeı-tegjeıli tekserilýde», - dep jazdy B. Mýsın.

Planshet kómegimen polıtseıler aıyppul jazýmen qatar, JSN arqyly júrgizýshi týraly barlyq qajetti málimetterdi, ıaǵnı kólik pen quqyq buzýshylyqtar týraly jáne basqa da derekterdi jyldam anyqtaı alady.

Baǵdat Mýsınniń sózine qaraǵanda, polıtsııa qyzmetkerleri jańa júıeni testileý barysynda keıbir túzetýlerdi engizý jaıynda ótinim bildirdi. Máselen, eger de jol erejesin buzýshy elektrondy hattamaǵa qol qoıýdan bas tartsa, onda faktini naqtylaý úshin kýágerlerge arnalǵan arnaıy jolaqty engizý qajet.

«Jalpy, júıe jaqsy jumys istep tur. Bolashaqta planshetti paıdalana otyryp, tehnıkalyq baıqaýdyń jáne saqtandyrý polıýsiniń bar nemese joqtyǵy tekseriledi. Osy arqyly, júrgizýshi tekserýge tek júrgizýshi kýáligin jáne jeke kýálikti (qajet bolǵan jaǵdaıda) ǵana usynady, al qalǵan málimetterdi polıtseıler planshetten kóre alady», - dedi ol.