Astana polıtseıleri malaızııalyqtyń joǵalǵan telefonyn qaıtaryp berdi
ASTANA. QazAqparat - Elordalyq polıtseıler Malaızııa azamatyna joǵalǵan uıaly telefonyn qaıtaryp berdi, dep habarlaıdy Astana qalasynyń ІІD baspasóz qyzmeti.
«EKSPO-2017» halyqaralyq kórmesiniń qonaqtary turatyn «EKSPO-vılladj» TK aýlasyndaǵy tirkeý aýmaqtaryn tekserý barysynda ýchaskelik ınspektorlar Nurlan Moldabekov pen Aıbek Tynybaev oryndyqtan «Samsýng» markaly uıaly telefon taýyp aldy.
Tekserý sharalary barysynda polıtsııa qyzmetkerleri telefon ıesin anyqtady, ol Malaızııa azamaty bolyp shyqty. Óz kezeginde sheteldik azamat tártip saqshylaryna alǵys aıtty.
