Astana polıtseıleri aıyppuldar jónindegi aqparattardy sms-habarlamalar arqyly taratpaq
ASTANA. QazAqparat - Astana qalasynyń Іshki ister departamenti aıyppul jóninde sms-habarlamalar taratý júıesin jasaýǵa kiristi. Bul týraly búgin brıfıngte Astana qalasy ІІD Ákimshilik polıtsııa basqarmasynyń bólim bastyǵy Tahır Ábdirahmanov málim etti.
«Jol erejesin nemese onymen baılanysty tártipti buzǵan kezde salynatyn aıyppul jóninde habarlamalar taratý bizdiń josparda bar. Qazir tipti balalardyń qolynda uıaly telefon bar, sondyqtan sizde aıyppul baryn sms-habarlamalar arqyly qulaqtandyratyn bolamyz. Ol azamattarǵa aıyppuldy ýaqytyly tóleý úshin usynys retinde jiberilip turady. Aıyppul ótelmegen jaǵdaıda olarǵa basqa sharalar qoldanylady», - dedi ol.
Onyń aıtýynsha, mundaı tájirıbe sottarda jaqsy nátıjeler kórsetken. Onda sms-habarlamalar sot otyrysy týraly aqparat taratylady.
«Mysaly, sizdi mas kúıde ustasa nemese joldyń qarsy baǵytyna shyǵyp ketseńiz, jol-kólik oqıǵasyn jasasańyz, jalǵan memlekettik nómir taǵyp alsańyz, ıaǵnı sot quzyryna ótetin baptardy buzsańyz, sizge ákimshilik hattama toltyrylady, keıin ol sotqa joldanady. Sodan soń, sizge sot otyrysy ótetin kún, sýdıanyń esimi, ákesiniń aty, tegi kórsetilgen sms-habarlama keledi», - dep atap ótti Tahır Ábdirahmanov.
ІІD bólim bastyǵynyń aıtýynsha, qazir polıtsııa qyzmetkerleri aıyppul týraly habardy «Qazposhta» arqyly hat túrinde joldaýǵa májbúr.
«Búginde biz aıyppul týraly aqparatty jetkizý úshin «Qazposhtanyń» qyzmetin paıdalanýdamyz. Bir konverttiń baǵasy - 400 teńge», - deıdi ol.
