Astana polıtseıleri ata-analarǵa avtooryndyqtardy durys tańdaýǵa keńes berdi
ASTANA. QazAqparat - Astana qalasy ІІD Ákimshilik polıtsııa basqarmasynyń qyzmetkerleri kólikte balalardy tasymaldaýdyń qaýipsizdigi jónindegi nasıhat jumysyn júrgizýde.
Osyndaı sharalardyń biri elordanyń №37 orta mektebinde ótti. Buǵan tómengi synyp oqýshylarynyń 150-den astam ata-anasy shaqyryldy, dep habarlaıdy astana. kz
Elordalyq polıtseıler balalarǵa arnalǵan avtooryndyqtar men arnaıy quraldardyń túrleri jáne balanyń jasyna sáıkes atalmysh avtooryndyqty qalaı durys tańdaý kerektigin naqtylap jetkizdi.
Jolaýshylar qatarynda balalardyń eń osal top bolyp tabylatyny belgili. Jol apaty kezinde eresek adamdarǵa qaraǵanda sábıler edáýir kóp zaqym alady. Balalardyń birqatary ata-ananyń eskermeı, qaýipsizdik beldigin taqpaýynyń saldarynan zardap shegedi.
Sondaı-aq atalmysh sala mamandary ata-analarǵa arnaıy krash-testterdi, avtooryndaqtardyń balalar ómirin qalaı saqtap qala alatyndyǵy týraly áleýmettik rolıkter kórsetti.
Astana qalasy ІІD ÁPB aǵa ınspektory Larısa Krasnıkovanyń aıtýynsha, perzenthanalarda, jalpy bilim beretin jáne mektepke deıingi bilim beretin mekemelerde ótkizilip jatqan "Bala - basty jolaýshy" dep atalatyn keń aýqymdy aktsııa kólik júrgizetin ata-analarǵa avtooryndyqtardyń mańyzdylyǵy týraly kóp maǵlumat beredi.
Jyl basynan beri elimizdiń avtojoldarynda jol apatynan 6 bala kóz jumsa, 17 jetkinshek aýyr jaraqat aldy.
Polıtseılerdiń málimetinshe, shet elderde ótkizilgen arnaıy ǵylymı zertteýler nátıjesinde avtooryndyqtar jol apaty kezinde balalardyń ólimin 80%, aýyr jaraqat alýdy 64-80%, jeńil jaraqatty 70% tómendetedi.
Sondaı-aq shara barysynda polıtsııa qyzmetkerleri men avtooryndyqtar boıynsha mamandar ata-analardyń kókeıkesti saýaldaryna jaýap berip, olarǵa aqparattyq kitapshalar taratty.
