Astana polıtseıleri 14 velosıped urlaǵan kúdiktini ustady
ASTANA. QazAqparat - Astana polıtseıleri 14 velosıped urlady degen kúdikpen Qaraǵandy oblysynyń 22 jastaǵy turǵynyn ustady, dep habarlaıdy QazAqparat elordalyq ІІD baspasóz qyzmetine silteme jasap.
Er adam úılerdiń kireberisterine kirip, urlaýdan qorǵaıtyn arqandardy kesip, oljasymen birge oqıǵa ornynan izin sýytyp júrgen.
Baspasóz qyzmetinde málim etkendeı, urlanǵan velosıpedter arzan baǵamen satylǵan. Qazirgi ýaqytta polıtseıler velosıpedterdi alý jáne zańdy ıelerine qaıtarý boıynsha sharalar ótkizip jatyr.
Kúdikti buǵan deıin de uqsas quqyqbuzýshylyq úshin qylmystyq jaýapkershilikke tartylǵan.
«Atalǵan derekterge qatysty QR QK-niń 188-shi babyna sáıkes sotqa deıingi tergeý amaldary júrgizilip jatyr. Ustalǵan azamat Astana qalasy ІІD-niń ýaqytsha tergeý ızolıatoryna jiberildi. Kúdiktiniń elorda aýmaǵynda basqa da uqsas qylmystarǵa qatystylyǵy tekserilip jatyr», delingen habarlamada.
