«Astana Piano Passion» baıqaýyna ótinimder qabyldaý 1 jeltoqsannan bastalady
ASTANA. QazAqparat - «Astana Piano Passion» ІІІ Halyqaralyq klassıkalyq mýzyka festıvali jáne jas pıanıstter baıqaýy 2015 jyly 24 sáýirde bastalady.
Ótinimderdi qabyldaý 2014 jyldyń 1 jeltoqsanynda bastalyp, 2015 jyldyń 1 naýryzyna deıin sozylady. Búginde «Astana Piano Passion» festıvali aıasyndaǵy halyqaralyq pıanıstter baıqaýyna, álemniń 100-den asa qalalarynan jáne 43 elden 252 jas daryndar qatysty. Jartylaı fınalǵa qazylar alqasy ádetttegideı 30 jas pıanıstti iriktep alady. Baıqaýǵa 2 jyl ýaqyt ishinde Astana qalasynda Qazaqstan, Reseı, Ýkraına, Japonııa, AQSh, Avstralııa, Ońtústik jáne Soltústik Koreıa, Danııa, Italııa, Armenııa, Sıngapýr, Qytaı jáne basqa álemniń túrli elderinen kelgen jas mýzykanttar óner kórsetti. «Astana Piano Passion» festıvali men baıqaýdy uıymdastyrýshylar - Astana qalasynyń ákimdigi jáne Máskeý fılarmonııasynyń qoldaýymen «Accordi di Astana» Qoǵamdyq qory. «Astana Piano Passion» baıqaýy 3 kezeń boıynsha ótedi: irikteý kezeńi (vıdeojazba boıynsha), jartylaı fınal (jeke baǵdarlama) jáne fınal (orkestrmen kontsert). Baıqaýǵa jasy 18-ge deıingi álemniń barlyq elderiniń pıanıstteri qatysa alady. Baıqaýdyń júlde qory - 60 000 AQSh dollary. Sondaı-aq, birinshi oryn alǵan kishi top (10 jasqa deıin), orta top (11-14 jas aralyǵy), úlken top (15-18 jas aralyǵy) qatysýshylarynyń muǵalimderine arnalǵan syılyqtar bar. Qazylar tóreliginiń aıqyn bolýy úshin, baıqaýdyń barlyq kezeńderi álemniń barlyq kórermenderi úshin on-laında tikeleı kórsetiledi. Zamanaýı tehnologııalardyń arqasynda, Ekinshi Halyqaralyq jas pıanıstter baıqaýyn 500 myńǵa jýyq kórermender tamashalaı aldy.
