«Astana Piano Passion» baıqaýyna qatysýǵa ótinimder qabyldaý merzimi uzartyldy
ASTANA. QazAqparat - Naýryz meıramyna oraı «Astana Piano Passion» halyqaralyq baıqaýyna qatysýǵa jas pıanıstterden ótinimderdi qabyldaý 21 naýryzǵa deıin uzartyldy.
Bul týraly elorda ákimdiginiń resmı saıtynda habarlanǵan. «Astana Piano Passion» baıqaýynyń saıtynda bul kúnderi dúrbeleń oryn alýda. Keıbir balalar beınejazbany daıyndaýǵa úlgermeı jatqandyqan uıymdastyrýshylardan ótinimderdi qabyldaý merzimin uzartý týraly ótinish kelip tústi. Ulystyń uly kúni - Naýryz merekesine oraı Uıymdastyrý komıteti tıisti sheshim qabyldady. Ótinimderdi qabyldaý merzimi 2014 jyldyń 21 naýryzyna deıin uzartyldy. Beınejazbalar boıynsha irikteý týrynan ótken jartylaı fınalǵa qatysýshylardyń esimderi 1 sáýirde belgili bolady. «Kóktemniń shýaqty kúnderi meıirimdilik jasaý - ár adamnyń paryzy dep sanaımyz. Birneshe aı boıy baıqaý baǵdarlamasyn daıyndaǵan balalardyń bári saıtta anketalaryn ornalastyryp úlgeredi dep úmittenemiz. Osylaısha, bıyl mamyr aıynda Astanada klassıkalyq mýzykanyń naǵyz merekesin taǵy da tamashalaıtyn bolamyz», - deıdi baıqaýdy uıymdastyrýshylar. Eske salaıyq, jas pıanıstterdiń «Astana Paino Passion» ІІ halyqaralyq baıqaýynyń jartylaı fınaly Astanada 10-16 mamyr kúnderi klassıkalyq mýzyka festıvaliniń aıasynda ótedi.
