«Astana Piano Passion» baıqaýy qatysýshylarynyń ónerin álemdik deńgeıdegi pıanıster baǵalaıdy
ASTANA. QazAqparat - "Astana Piano Passion" ІІІ halyqaralyq klassıkalyq mýzyka festıvaline jáne jas pıanıster baıqaýyna ótinimderdi qabyldaý bastaldy, dep habarlaıdy baıqaýdy uıymdastyrýshylar.
«2014 jyly 1 jeltoqsanda Tuńǵysh Prezıdent kúnine oraı «Astana Piano Passion» ІІІ halyqaralyq klassıkalyq mýzyka festıvali jáne jas pıanıster baıqaýyna qatysý ótinimderin qabyldaý bastaldy. Baıqaýdyń fınaly 2015 jyly 24 sáýir men 2 mamyr aralyǵynda ótedi. Baıqaýdyń arnaıy saıtynda baıqaýǵa qatysýdyń talaptary tolyqtaı kórsetilgen Baıqaýdyń erejeleri jarııalandy. Úshinshi baıqaýǵa aıtarlyqtaı ózgerister engizilmegen, tek baıqaýdyń jartylaı fınaly men fınaldyń ótý kúni ózgertilgen», delingen habarlamada.
Festıval-baıqaýdy uıymdastyrýshylar - Astana qalasynyń ákimdigi men «Accordi di Astana» qoǵamdyq qory. Baıqaýdyń kórkemdik jetekshisi jáne qurmetti tóraǵasy - Reseıdiń Halyq ártisi, Denıs Matsýev.
Jas pıanıster baıqaýy Qazaqstannyń jas daryndaryn tárbıelep ósiredi jáne jastardy mýzykamen aınalysýǵa tartady. «Astana Piano Passion» ІІІ halyqaralyq jas pıanısterdiń festıval-baıqaýyn uıymdastyrýdyń maqsaty: fortepıano óneri salasynda jańa talanttardy aıqyndaý, ulttyq fortepıano mektepteri dástúrin nyǵaıtý, oryndaýshylyq óner ádisterimen halyqaralyq almasý, ulttyq mektepterdiń dástúrleri men shyǵarmashylyq baılanystaryn nyǵaıtý, fortepıano bóliminde oqytýdyń sheberlik deńgeıin joǵarylatý. Qatysýshylardyń ónerin bedeldi halyqaralyq qazylar alqasy quramyna kiretin álemdik ataqqa ıe pıanıster, aıtýly halyqaralyq baıqaýlardyń mýzykalyq prodıýsserleri baǵalaıtyn bolady. Qatysýshylardyń jasy - 18 jasqa deıin. Baıqaýdyń jalpy júlde qory - 60 000 AQSh dollary. Baıqaýǵa qatysý tegin, buǵan qosa, uıymdastyrý komıteti qatysýshy men ony alyp júretin adamnyń jolaqysy men Astana qalasynda turý aqysyn tóleıdi. Jas oryndaýshylardy Astana qalasynyń ákimi atynan eki arnaıy syılyq, baıqaýdyń kórkemdik jetekshisi atynan arnaıy syılyqtar, halyqaralyq festıvalderine qatysý, Sýzdal qalasyndaǵy jazǵy lagerge barý, sondaı-aq qazaqstandyq kompozıtodyń shyǵarmasyn úzdik oryndaýshyǵa arnalǵan arnaıy syılyq kútip tur jáne baıqaýdyń laýreattary atanǵan qatysýshylardyń ustazdaryna da syılyq taǵaıyndalǵan. Іrikteý týryn arnaıy qurylǵan komıssııa 2015 jyldyń 1-20 naýryz aralyǵynda ótkizedi. Baıqaýǵa qatysýshylar irikteý týrynyń qorytyndysy boıynsha anyqtalady. Jartylaı fınalǵa sany 30-dan aspaıtyn jas mýzykanttar jiberiledi. Baıqaýǵa qatysý týraly tolyq anyqtamany www.astana-app.kz saıtynan bilýge bolady.
