«Astana Piano Passion» baıqaýy qatysýshylaryna onlaın rejimde daýys berýge bolady
ASTANA. QazAqparat - «Astana Piano Passion» baıqaýy qatysýshylaryna onlaın rejimde daýys berýge bolady. Bul týraly búgin «Astana Piano Passion» baıqaýynyń ashylýyna arnalǵan brıfıngte Astana qalalyq mádenıet basqarmasynyń bastyǵy Bolat Majaǵulov málim etti.
«Bıylǵy jyldyń basty jańalyǵy - barlyq nıet tanytqan adamdar «Astana Piano Passion» jas pıanısshiler baıqaýynyń qatysýshylaryna baıqaýdyń arnaıy saıty arqyly onlaın rejimde daýys bere alady. Bul shara búgin bastaldy. Eń kóp daýys jınaǵan pıanst «kórermen kózaıymy» syılyǵyn ıelenedi», - dedi ol.
Onyń atap ótýinshe, balalardyń ónerlerin baıqaýdyń arnaıy saıty arqyly tamashalaýǵa bolady. Máselen, ótken jyly osy saıt arqyly 3 qurlyqtyń 100 myńnan astam adamy baıqaýǵa kýá boldy. Bıyl ǵalamtor arqyly tamashalaýshylardyń sany arta túsetindigi sózsiz.
«16 mamyrǵa deıin sozylatyn "Astana Piano Passion" ІІ halyqaralyq baıqaýy aıasynda elordada Reseı halyq ártisi Denıs Matsýev, RF Prezıdenti janyndaǵy mádenıet jáne óner jónindegi keńestiń múshesi Ekaterına Mechetınanyń kontsertteri uıymdastyrylyp, Seýldegi Ulttyq ýnıversıtettiń professory Hıýng-Djýn Chang, Parıj konservatorııasynyń ustazy Mıshel Beroff tegin sheberlik synyptaryn ótkizetin bolady», - dedi B.Majaǵulov.
