«Astana-Petropavl» trassasynda jol apatynan 29 jastaǵy júrgizýshi kóz jumdy

KÓKShETAÝ. QazAqparat – Aqmola oblysynyń Shortandy aýdany aýmaǵynda jol-kólik oqıǵasy boldy, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, jol apaty 19 qyrkúıek kúni saǵat 07:12 shamasynda «Astana-Petropavl» avtojolynyń 26 shaqyrymynda bolǵan.

«Anyqtalǵandaı, Stepnogor qalasynyń 29 jastaǵy turǵyny basqarǵan «VMW» kóligi alda Kókshetaý baǵytynda júrip kele jatqan «Gazel» kóligimen soqtyǵysqan. Saldarynan jeńil kóliktiń júrgizýshisi alǵan dene jaraqatynan oqıǵa ornynda kóz jumdy», - dedi vedomstvodan.

Qazirgi ýaqytta jol-kólik oqıǵasyna baılanysty Qylmystyq kodekstiń 345-baby 3-bóligi boıynsha sotqa deıingi tergeý amaldary qolǵa alyndy.

Sonymen birge, sot-medıtsınalyq saraptama taǵaıyndaldy.

Aıta ketsek, «Astana – Petropavl» tasjolynda bulannyń kesirinen eki jol-kólik oqıǵasy bolǵan edi.