Astana — Petropavl tasjolyndaǵy kólik órtinen qaza tapqandar arasynda jasóspirim bar
ASTANA. KAZINFORM — Astana — Petropavl avtojolynda bolǵan kólik órtinen qaza tapqandardyń arasynda kámeletke tolmaǵan jasóspirim bar. Al aman qalǵan adamnyń denesiniń 90 paıyzyn kúıik shalǵan.
Bulandy aýdanynyń Jańatalap aýyly mańyndaǵy Astana — Petropavl avtojolynda bolǵan avtokólik órtine baılanysty polıtsııa tekserý júrgizip jatyr.
— Oqıǵa ornynda polıtsııa qyzmetkerleri men tótenshe jaǵdaılar qyzmetiniń mamandary jumys istep jatyr. Úsh adam qaza tapty. Marqumdardyń jeke basy anyqtalyp jatyr, olardyń arasynda kámeletke tolmaǵan jasóspirim de bar. Tekserý qorytyndysy boıynsha qoldanystaǵy zańnamaǵa sáıkes protsessýaldyq sheshim qabyldanady, — dep habarlady Aqmola oblysy polıtsııa departamenti.
Sonymen qatar Aqmola oblysynyń densaýlyq saqtaý basqarmasy Kazinform tilshisiniń resmı saýalyna bergen jaýabynda aman qalǵan adamnyń jaǵdaıy áli de óte aýyr delingen.
— Naýqas Aqkól aýdandyq aýrýhanasynyń jansaqtaý bóliminde jatyr. Denesiniń 90 paıyzyn kúıik shalǵan. Kúıik aýmaǵynyń óte úlken bolýyna baılanysty ony basqa medıtsınalyq mekemege tasymaldaý ázirge múmkin emes. Qazir naýqasta kúıiktik shok bar, — dep jaýap berdi vedomstvo.
Buǵan deıin Aqmola oblysynyń Bulandy aýdanyndaǵy Jańatalap aýylynyń mańyndaǵy Astana — Petropavl tasjolynda kólik órtengenin jazǵanbyz.
