Astana — Petropavl tasjolynda kólik órtendi: qaza tapqandar bar
ASTANA. KAZINFORM — Aqmola oblysynyń Bulandy aýdanyndaǵy Jańatalap aýylynyń mańyndaǵy Astana — Petropavl tasjolynda kólik órtendi.
Áleýmettik jelilerde oqıǵa ornynan túsirilgen vıdeolar tarady. Onda kóliktiń tolyǵymen otqa oranǵanyn kórýge bolady. Jeli qoldanýshylary apat saldarynan qaza tapqandar bar bolýy múmkin ekenin jazǵan.
Polıtsııa bul jol apatyna qatysty tergeý júrgizip jatyr. Oqıǵa ornynda polıtsııa men tótenshe jaǵdaılar qyzmeti júr. Oqıǵa saldarynan qaza tapqandar bar, olardyń jeke basy anyqtalyp jatyr.
— Tergeý qorytyndysy boıynsha qoldanystaǵy zańnamaǵa sáıkes protsessýaldyq sheshim qabyldanady, — dep habarlady Aqmola oblystyq polıtsııa departamenti.
Polıtsııa sonymen qatar azamattardy tekserilmegen aqparat taratpaýǵa jáne tergeýdiń resmı nátıjesin kútýge úndedi.
Eske salaıyq, buǵan deıin Jetisý oblysyndaǵy Almaty-Óskemen tasjolynyń 171-shaqyrymynda jol apaty bolǵan edi. Eki Toyota Camry kólikteri soqtyǵysyp, jol apaty saldarynan bir adam qaza taýyp, jeti adam jaraqat alǵanyn habarlaǵanbyz.
