Astana – Petropavl tasjolynda 64 shaqyrymǵa jańa asfalt tóseldi
ASTANA. KAZINFORM — Soltústik Qazaqstan oblysynda respýblıkalyq mańyzy bar Astana – Kókshetaý – Petropavl avtojolynyń tańdamaly ýchaskelerin ortasha jóndeý jumystary jalǵasýda. Qazirdiń ózinde 64 shaqyrymǵa asfalttyń joǵarǵy qabaty tóselip, 60 shaqyrym jol jıegi nyǵaıtyldy. Bul týraly QazAvtoJol kompanııasy málim etti.
Soltústik Qazaqstan oblysynda respýblıkalyq mańyzy bar KAZ02 «Astana – Kókshetaý (aınalma joly) – Petropavl – RF shekarasy (Jańa Jol ótkizý pýnkti)» avtomobıl jolynyń 341-473 shaqyrym aralyǵyndaǵy tańdamaly ýchaskelerinde ortasha jóndeý jumystary jalǵasyp jatyr.
Kompanııanyń málimetinshe, joba aıasynda 68,7 shaqyrym jolda eski asfaltbeton jabyny jonyldy jáne 68,7 shaqyrymda tegisteýshi qabat tóselgen. Sonymen qatar 64 shaqyrymda qıyrshyqtas-mastıkaly asfaltbeton qospasynan joǵarǵy qabat tóselip, 60 shaqyrymda jol jıekteri nyǵaıtyldy.
Qazirgi ýaqytta jumystar bekitilgen kestege sáıkes jalǵasyp jatyr.
Ortasha jóndeý jol jabynynyń sapasyn jaqsartýǵa, avtojoldyń paıdalaný merzimin arttyrýǵa jáne qozǵalys qaýipsizdigin qamtamasyz etýge baǵyttalǵan.
Aıta keteıik, buǵan deıin Astana–Temirtaý jolynyń 16 shaqyrymy jańartylyp, 9 kirme jol jasalǵanyn jazǵan edik.
