«Astana-Petropavl» tas jolynda avtobýs isten shyǵyp, 22 jolaýshy qutqaryldy
KÓKShETAÝ. QazAqparat - Aqmola oblysynda jol-patrýldik polıtsııasy batalonynyń qyzmetkerleri isten shyqqan avtobýstaǵy 22 jolaýshyǵa kómek kórsetti, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń deregi boıynsha, qarashanyń 24-inde túngi saǵat 05:10 shamasynda jol-patrýldik polıtsııasy batalonynyń qyzmetkerleri polıtsııa aǵa serjanty Ashat Ýálıev pen polıtsııa serjanty Temirlan Tilegenov «Astana-Petropavl» tas jolynyń 233 shaqyrymynda joldyń shetinde turǵan avtobýsty baıqaǵan.
Jolaýshylar kóliginiń júrgizýshisiniń aıtýynsha, «Omsk - Astana» baǵytyndaǵy «Volvo» avtobýsynyń janarmaı júıesi isten shyqqan. Sol kezde, kólikte 22 jolaýshymen birge 3 júrgizýshi boldy.
«Polıtseılerdiń qyraǵylyǵynyń arqasynda avtobýsta bolǵan adamdardyń eshqaısysy da tońyp úlgergen joq. Polıtseıler dereý jolaýshylardy atalǵan baǵyt boıynsha júrip bara jatqan ózge «Volvo» avtobýsyna otyrǵyzyp jiberdi. Al, isten shyqqan kóliktiń aqaýyn retteý úshin jaqyn mańdaǵy «Shekara-Býrabaı» statsıonarlyq beketiniń aýmaǵyna súırep jetkizdi» dep kórsetilgen PD baspasóz qyzmetiniń habarlamasynda.
