«Astana - Petropavl» baǵytyndaǵy kólik apatyna qatysty qylmystyq is qozǵaldy
KÓKShETAÝ. QazAqparat - Aqmola oblysy aýmaǵynda «Astana - Petropavl» tas jolynyń boıynda bolǵan jol apatyna baılanysty qylmystyq is qozǵaldy, dep habarlaıdy QazAqparat ІІD baspasóz qyzmetine silteme jasap.
Eske sala keteıik, osyǵan deıin habarlanǵandaı, jol apaty qarashanyń 11-i kúni saǵat 12:40 shamasynda «Astana-Petropavl» tas jolynyń 287 shaqyrymynda, ıaǵnı, Kókshetaý qalasynyń mańynda tirkeldi. Apattyń saldarynan 3 adam kóz jumyp, 7 adam zardap shekti. Zardap shekkenderdiń biri búldirshin .
«Polıtseıler anyqtaǵandaı, Ekibastuz qalasynyń 52 jastaǵy turǵyny tizgindegen «Toıota Land Krýzer Prado» kóligi joldyń qarsy baǵytynda shyǵyp ketip, Almaty oblysynyń Horgos aýylynyń 34 jastaǵy turǵyny rólde otyrǵan «Mıtsýbısı Delıka» kóligimen soqtyǵysqan. Osynyń saldarynan «Toıota Land Krýzer Prado» kóliginiń 2 jolaýshysy oqıǵa ornynda til tartpaı ketse, júrgizýshisi aýrýhanada kóz jumdy. Sondaı-aq, osy kóliktiń salonynda bolǵan taǵy úsh adam (onyń biri búldirshin) zardap shekti. Oǵan qosa, «Mıtsýbısı Delıka» kóliginiń júrgizýshisi men úsh jolaýshysy Aqmola oblystyq aýrýhanasyna jetkizildi» - dep túsindirdi baspasóz qyzmetindegiler.
Qazirgi kezde, osy oqıǵaǵa baılanysty QR QK 345-baby boıynsha qylmystyq is qozǵalyp, sotqa deıingi tergeý amaldary júrgizilýde.
