Astana perzenthanalarynyń 68 paıyzy shamadan tys júktememen jumys istep tur
ASTANA. QazAqparat – Astanada perınataldyq ortalyq salý qajet. Ashyq NQA portalynda jarııalanǵan «2023-2027 jyldarǵa arnalǵan elordanyń densaýlyq saqtaý júıesin damytýdyń keshendi josparynda» osylaı jazylǵan, dep habarlaıdy QazAqparat tilshisi.
«Astana qalasy boıynsha áıelderge júktilik, bosaný, bosanǵannan keıingi kezeńde jáne jańa týǵan nárestelerge statsıonarlyq medıtsınalyq kómek 550 tósektik kereýettik qýaty bar úshinshi deńgeıdegi úsh bosandyrý uıymynyń tıisti qurylymdyq bólimsheleri kómek kórsetedi. Eldiń basty qalasy mártebesin alǵannan beri elordada 130 tósek-orynǵa arnalǵan bir ǵana perınataldyq ortalyq salyndy, ol 2009 jyly paıdalanýǵa berildi. Astana qalasy halqynyń ósýine baılanysty perınataldyq ortalyqtardyń tósek qory naqty alańdy ulǵaıtpaı, nyǵyzdaý jolymen kezeń-kezeńimen 335-ten 550 tósekke deıin (39%-ǵa) keńeıtildi. Sonymen qatar akýsherlik kereýetter 68% shamadan tys júktelgeni baıqalady», - dep másele kóterilgen keshendi josparda.
Júktemeni azaıtý úshin Densaýlyq saqtaý mınıstrligi bas shahardaǵy Abylaı han dańǵyly men Qobda tuıyq kóshesiniń qıylysynda perınataldyq ortalyq salýdy josparlap otyr.
