Astana-Pavlodar jolynda kólik apatyna túsken jas jigit eki aıaǵynan aıryldy
PAVLODAR. KAZINFORM — Astana — Pavlodar avtojolynda iri jol-kólik oqıǵasy tirkeldi.
Jeńil kólik jol jıegindegi qorshaýǵa soǵylyp, apat saldarynan 2005 jylǵy jolaýshy aýyr jaraqat alǵan.
Oqıǵa ornynan túsirilgen beınejazba áleýmettik jelide tarap ketti.
Jol-kólik apaty 29 mamyr kúni saǵat 21:00 shamasynda Tórtqudyq aýylynyń mańynda bolǵan. Hyundai Tucson markaly qara tústi avtokóliktiń 2004 jyly týǵan júrgizýshisi rólge ıe bola almaı, jol qorshaýyna soǵylǵan.
Jazataıym oqıǵa kezinde 2005 jyly týǵan jas jigit asa aýyr jaraqat alǵany, soqqy saldarynan bir aıaǵy julynyp ketkeni aıtylady. Oqıǵa kýágerleriniń habarlaýynsha, jedel járdem brıgadasy oqıǵa ornyna bir jarym saǵatqa jýyq júrip kelgen. Osy ýaqyt boıy jaraqat alǵan jigit esin bilip jatqan.
Alaıda zardap shekken azamatty Ekibastuz qalasyndaǵy aýrýhanaǵa tasymaldaý kezinde jaǵdaıy kúrt nasharlaǵan. Esinen tanyp, júregi toqtap qalǵan.
Dárigerlerdiń kómegimen jaǵdaıy qalpyna keltirilgenimen, aýrýhanadaǵy jansaqtaý bóliminde onyń eki aıaǵyn da kesýge týra kelgen. Qazirgi ýaqytta naýqastyń jaǵdaıy aýyr dep habarlandy.
Polıtseıler atalǵan oqıǵa boıynsha tergeý amaldary júrgizilip jatqanyn habarlady.
— Jol-kólik oqıǵasy saldarynan úsh jolaýshy aýrýhanaǵa jetkizilgen. Hyundai Tucson avtokóligi aıyp turaǵyna qoıyldy, — dep málimdedi Pavlodar oblysynyń polıtsııa departamentinen.
Zardap shekken jigittiń jaqyndary men týystary tergeýdi muqııat júrgizýdi talap etýde. Olardyń sózinshe, kólik inDrive taksı servısi arqyly izdelip, tapsyrys berilgen. Alaıda tapsyrysty oryndaýǵa is júzinde múlde basqa kólik jáne basqa júrgizýshi kelgen.
Eske sala keteıik, buǵan deıin Pavlodar oblysynda An-2 ushaǵy apatqa ushyrap, ushqyshtyń biri kóz jumdy.
