Astana — Pavlodar tasjolynyń jóndelip jatqan bóligi qashan tolyq ashylady
PAVLODAR. KAZINFORM — Astana — Pavlodar avtojolynyń Shiderti kenti mańyndaǵy jóndeý jumystary aldaǵy bir jarym aı ishinde tolyq aıaqtalady dep kútilip otyr. Bul týraly «QazAvtoJol» ulttyq kompanııasynyń óńirlik fılıaly málimdedi.
Astana — Pavlodar avtobanynyń bir bóligi — Shiderti kenti mańyndaǵy nashar joldyń máselesi on jylǵa jýyq aıtylyp kelgen edi. Joldyń bul bóligi asfaltpen kómkerilgen. Jaqyn jerdegi Bozshakól kenishiniń júk kólikteri bul ýchaskeni únemi búldirip, elordamen eki ortada júretin kólik aǵynyna aıtarlyqtaı kedergi keltirgen bolatyn. Ásirese 230-253 shaqyrym aralyǵy túnde júrgen ýaqytta qaýipti.
— Jóndeý jumystary respýblıkalyq mańyzy bar «Astana — Shiderti — Pavlodar — Ýspenka — Reseı Federatsııasynyń shekarasy» avtomobıl jolynyń 230,544–253,120 shaqyrym aralyǵynda júrgizilip jatyr. Jóndeletin ýchaskeniń uzyndyǵy — 22,5 shaqyrymnan astam, — dep habarlady Kazinform tilshisine «QazAvtoJol» ulttyq kompanııasynyń óńirlik fılıalynan.
Jóndeý jumystary aıaqtalǵanǵa deıin joldaǵy qozǵalys ýaqytsha shektelýde. Atap aıtqanda, bıylǵy sáýir aıynan beri joldyń bir baǵyty jabylyp, kólik qozǵalysy ekinshi jaǵymen uıymdastyrylyp jatyr.
— Jumystardy 2026 jylǵy 1 jeltoqsanǵa deıin tolyq aıaqtaý josparlanǵan. Atalǵan merzimge deıin júrgizýshilerdi ýaqytsha jol belgileri men tańbalarynyń talaptaryn qatań saqtaýǵa, jóndeý ýchaskesine jaqyndaǵanda jyldamdyqty aldyn ala tómendetýge shaqyramyz. Jolda arnaıy tehnıka men jumysshylar júretindikten, qaýipsizdik talaptaryn saqtaý mańyzdy, — dep eskertti kompanııadan.
Buǵan deıin Qazaqstan joldaryn kim buzyp jatqany týraly materıal usynǵanbyz.
