«Astana-Pavlodar» kúre joly ashyldy
ASTANA. QazAqparat - Búgin túnde «Astana-Pavlodar» tas joly ýchaskesinde jol qozǵalysy ashyldy. Bul týraly QazAqparat tilshisine «QazAvtoJol» UK» AÓ-niń baspasóz qyzmeti habarlady.
«Túnde 12-de jol qyzmetteri men merdigerlik uıym kúshteri joldy ashty. Sý deńgeıi ázirge túse qoıǵan joq», - dedi baspasóz qyzmetinen.
Eske salsaq, nóser jaýyn saldarynan Ereımentaý aýdanynda Óleńti ózeniniń arnasynda sý deńgeıi kóterilgen. Saldarynan respýblıkalyq mańyzy bar Astana-Ereımentaý-Shiderti jolynyń 205-shi shaqyrymyndaǵy aınalma joldy sý shaıyp ketti. Negizgi joldaǵy kópir jol jóndeýge baılanysty buzylǵan.
Kólik keptelisin boldyrmaý úshin jol jabylǵan bolatyn. Astana men Pavlodar qatynasy Qaraǵandy arqyly júzege asty.
