Astana – Pavlodar avtojolynda jóndeý jumystary júrgizilip jatyr
ASTANA.KAZINFORM - Respýblıkalyq mańyzy bar KAZ04 «Astana – Shiderti – Pavlodar – Ýspenka – RF shekarasy» avtomobıl jolynda jol qyzmetteri tsementbeton jabynynyń jaı-kúıine josparly monıtorıng júrgizip, kútip-ustaý jumystaryn jalǵastyryp jatyr.
Aptap ystyqqa baılanysty temperatýralyq deformatsııalardyń aldyn alýǵa erekshe nazar aýdarylyp otyr. Jol qyzmetteri beton plıtalarynyń kóterilýine jáne jolda qaýipti jaǵdaılardyń týyndaýyna jol bermeý úshin aldyn ala profılaktıkalyq sharalar qabyldap jatyr.
Búgin, 28 maýsymda Astana – Pavlodar baǵyty boıynsha 413-shaqyrymda júrgizilgen tekserý barysynda «QazAvtoJol» ulttyq kompanııasy» AQ Pavlodar oblystyq fılıalynyń mamandary qalpyna keltirý jumystaryn júrgizýdi qajet etetin ýchaskeni anyqtaǵanyn málim etti.
Jol qozǵalysy qaýipsizdigin qamtamasyz etý maqsatynda atalǵan ýchaskede ýaqytsha jol belgileri ornatyldy. Osydan keıin jol qyzmetteri jóndeý jumystaryna kiristi. Jóndeý aıasynda jabyndy demontajdaý, qıyrshyqtas negizin tóseý jáne asfaltbeton qospasyn salý jumystary oryndalyp jatyr.
Jumysqa mamandar men arnaıy tehnıka jumyldyryldy. Buǵan deıin de osy baǵytta beton plıtalaryndaǵy ishki kerneýdi tómendetýge baǵyttalǵan profılaktıkalyq is-sharalar, onyń ishinde kompensatsııalyq jikterdi kesý jáne jergilikti jóndeý jumystary júrgizilgen bolatyn.
Astanada taǵy bir kóshe ýaqytsha jabylatynyn jazǵan bolatynbyz.
