Astana-Pavlodar avtojolynda jyldamdyq shektelgenine qaramastan kólik apattary eki ese kóbeıgen
PAVLODAR. KAZINFORM – QR Іshki ister mınıstrliginiń málimetinshe, atalǵan aqyly joldan táýligine 5 myńdaı avtokólik ótedi. Eki aralyq 375 shaqyrymdy quraıdy.
Óńirlik polıtsııa departamentiniń málimetinshe, jyl basynan beri oblys aýmaǵynda 188 jol-kólik oqıǵasy tirkelgen. Saldarynan 10 adam qaza taýyp, 283 adam jaraqat alǵan. Al ótken jyldyń dál osy kezeńinde tártip saqshylary 234 apatty tirkepti (13 adam opat bolyp, 323 adam zardap shekken).
– Oblysta bıyl qysqy kezeńdegi jol-kólik oqıǵalary shamamen 20%-ǵa azaıǵany baıqaldy. Buǵan jyl basynda Astana baǵytyndaǵy tasjolda jyldamdyqty saǵatyna 110 shaqyrymǵa deıin shekteýdiń engizilýi óz septigin tıgizdi, - dep málimdedi departamentten.
Alaıda QR Іshki ister mınıstrliginiń baspasóz qyzmeti usynǵan derekter basqasha órbıdi. Vedomstvo aqparatynda kerisinshe apattar sany jıilegeni kórsetilgen.
– Bıylǵy qys aılarynda Astana-Pavlodar avtojolynda 11 jol-kólik oqıǵasy tirkelgen. Bul ótken jylǵy osy kezeńmen salystyrǵanda eki ese kóp. Avtoban aqyly. Onyń ishinde 24 km (230–254 km aralyǵy) bóligi paıdalanýǵa berilmegendikten, aqy alynbaıdy. Táýligine shamamen 5 myńdaı avtokólik júrip ótedi, - dep habarlady Kazinform tilshisine mınıstrliktiń baspasóz qyzmetinen.
Eske sala keteıik, Astana – Pavlodar avtojolyndaǵy jyldamdyq rejımi qalpyna keltirildi. Júrgizýshiler tórt jolaqty avtobanda endi burynǵysha saǵatyna 140 shaqyrym jyldamdyqpen júıitkı alady. Ózgeris 30 naýryzdan engizildi.
