Astana – Pavlodar avtobanynda júrgizýshilerge qatysty mańyzdy ózgeris bar
PAVLODAR. KAZINFORM — Aldaǵy qysta Astana — Pavlodar avtobanynda jyldamdyq rejımi turaqty tómendetilmeıdi. Bul ózgeris júrgizýshiler úshin qolaıly bolady dep josparlanyp otyr.
QR Іshki ister mınıstrliginiń baspasóz qyzmeti Kazinform tilshisiniń saýalyna bergen jaýabynda avtojoldardaǵy jyldamdyq rejımin tek qysqy kezeńde tómendetý týraly sheshim qabyldanǵany kórsetilgen.
— Qysqy kezeńniń bastalýyna jáne jol men aýa raıy jaǵdaılarynyń nasharlaýyna baılanysty jol-kólik oqıǵalarynyń jıileýine oraı halyqaralyq jáne respýblıkalyq mańyzy bar barlyq avtomobıl joldarynda jyldamdyq rejımin tek qysqy kezeńge tómendetý týraly sheshim qabyldanady, — delingen jaýapta.
Mınıstrlik ókilderiniń aıtýynsha, avtokólik joldarynda jyldamdyqty shekteý adam ólimine sebep bolatyn jol-kólik oqıǵalarynyń sanyn azaıtýǵa jáne aldyn alýǵa múmkindik beredi. Degenmen naqty nátıje joldyń jaǵdaıyna, qozǵalys qarqyndylyǵyna, aýa raıyna jáne belgilengen jyldamdyqtyń saqtalýyna baılanysty.
— Astana — Pavlodar baǵyty boıynsha avtojolda jyldamdyq rejıminiń saǵatyna 110 shaqyrymǵa tómendetilýi týraly aldyn ala aqparat quraldary men áleýmettik jeliler arqyly habarlanady, biraq jyldamdyq rejımin tómendetý byltyrǵydaı turaqty engizilmeıdi. Ol tek aýa raıynyń ózgerýine baılanysty ǵana qoldanylady, — dep kórsetilgen jaýapta.
Osylaısha, Jol júrisi qaǵıdalarynyń 5-tarmaǵynyń 2) tarmaqshasyna sáıkes, jyldamdyq rejımi ýaqytsha ózgergen ýaqytta jol júrisine qatysýshylar jol júrisin retteý úshin qoldanylatyn retteýshi men baǵdarsham sıgnaldarynyń, jol belgileriniń jáne jol tańbalarynyń talaptaryn oryndaýǵa mindetti bolady.
Eske sala keteıik, byltyr 9 aqpannan Astana — Pavlodar avtobanynda jyldamdyq rejımi tómendetilgen edi.
Sondaı-aq Astana — Pavlodar tasjolynyń bıyl jóndelip jatqan bóligi qashan tolyq ashylatynyn jazǵanbyz.
