«Astana - Parıj» velomarafonyna qatysýshylar Tatarstanǵa jetti
ASTANA. QazAqparat - «Astana - Parıj» velosıped jarysynyń qatysýshylary «Shekteýsiz sport» áleýmettik jobasy aıasynda Tatarstanǵa keldi, dep habarlaıdy QazAqparat tilshisi Reseıdegi Qazaqstan elshiliginiń saıtyna silteme jasap.
Velomarafon «Rýhanı jańǵyrý» baǵdarlamasy aıasynda «Anashym» kózi kórmeıtin múgedek balalar men jastarǵa kómek kórsetý qory» jáne qazaqstandyq «El Tiregi» shaǵyn jáne orta bıznes qaýymdastyǵynyń qoldaýymen ótkizilýde.
Zaǵıp jáne nashar kóretin spotshylardan jasaqtalǵan komanda alty eldiń 30 qalasyn biriktirip, 5 myń shaqyrym joldan ótedi. Olardyń qatarynda Qazaqstan, Reseı, Belarýs, Polsha, Germanııa jáne Frantsııa elderi bar.
«Shekteýsiz sport» jobasynyń jáne velomarafonnyń uıymdastyrýshylarynyń biri Danııar Bazarbek osydan úsh jyl buryn jobaǵa eń alǵash aǵasy men birneshe mektep kezindegi dostary qatysqanyn aıtty. Alǵashqy velomarafon 2016 jyly Almaty men Astananyń arasynda ótken. Odan keıingi marafon halyqaralyq deńgeıge kóterilip, velokomanda Almatydan Ystyqkólge barǵan. Bıyl joba qatysýshylary iri velochempıonattardyń otany - Frantsııa elin baǵyndyrýǵa bel býǵan.
Zaǵıp jandar velotandemde qozǵalady, ıaǵnı rýlge kózi kóretin pılot otyrady, al ekinshi oryndaǵy adamdy «stoker» dep ataıdy. Joba bastalǵaly beri onyń qatysýshylary ár apta saıyn jattyǵýdy ádetke aınaldyrǵan. Qazirgi tańda stokerler men olardyń pılottary bir birin velosıpedtiń qımylynan-aq túsinetin bolǵan.
«Jarys kezinde stokerler qandaı da bir qıyndyqtarǵa dýshar bolmaıdy. Sebebi pılottar marafonnyń basynan aıaǵyna deıin kómektesip júredi. Mysaly, aıaldama bolsa, velosıpedterdi toqtatyp qoıady, stokerge qajet bolsa, sýyn beredi, sondaı-aq eshqashan qaýipti jerde jalǵyz qaldyrmaıdy. Pılot - stokerdiń járdemshisi, sondyqtan oǵan kómek kerek bolǵan jaǵdaıda jalǵyz qalyp qoıýy múmkin emes», - dedi Danııar Bazarbek.
«Shekteýsiz sport» jobasynyń qatysýshylary «Maqsat barda - kedergige jol joq» uranymen júredi. Olar marafondary arqyly basqa da adamdardy yntalandyrýǵa tyrysady. Saıahat barysynda qatysýshylarǵa ózge velosıpedshiler kelip qosylyp, olarmen birge 50 nemese odan da kóp shaqyrym joldy júrip ótken.
