ASTANA-PARIS velosherýine qatysýshylar Qostanaıǵa keldi
QOSTANAI. QazAqparat - «Astana - Parıj» velomarafonynyń qatysýshylary Qostanaı qalasyna atbasyn tiredi, dep habarlaıdy QazAqparat.
Zaǵıp jáne kózi nashar kóretin áýesqoı sportshylardyń«Blind Race Astana - Paris» qurlyqaralyq velomarafony Astana qalasynan bastaldy. Qatysýshylar 5 myń shaqyrymnan astam qashyqtyqty júrip ótip, velosporttyń astanasy sanalatyn Parıjge jetýi tıis. «Astana - Parıj» velosherýiniń kapıtany Baqtııar Bazarbekovtiń sózinshe, sharanyń maqsaty - velosıpedti ekologııalyq taza kólik túri retinde dáripteý, eldegi ekotýrızmdi damytý, qamkóńil jandarǵa rýhanı kómek berý.
«Bizdiń komanda 4 tandemnen turady. Ár veloshabandozdyń qasynda bir erikti júredi. Kún saıyn biz 200 shaqyrym qashyqtyqty baǵyndyramyz. Bizdiń komanda bastapqyda 5 adamnan quralǵan edi. Mine, bul joly 16 áýesqoı sportshy jolǵa shyqtyq. Jalpy, Parıjge jeter jolda álemniń 30 qalasyn basyp ótemiz», - dedi Baqtııar Bazarbekov.
Sporttyq shara 2018 jyldyń qyrkúıek aıynyń ortasynda aıaqtalmaq. Endi sportshylar Qostanaıdan ótip, Reseı tasjolyna túsedi.
