«Astana» óz alańynda «Dınamodan» jeńilip jatyr
ASTANA. QazAqparat - «Astana» óz alańynda ÝEFA Chempıondar lıgasyna irikteý kezeńiniń 3-raýndy aıasynda Horvatııanyń «Dınamo» (Zagreb) komandasymen oınap jatyr, dep habarlaıdy QazAqparat tilshisi.
Oıyn basynda alań ortalyǵyn ıemdený úshin keskilesken kúres júrdi. «Astana» óz jankúıerleriniń kóz aldynda birinshi nómirmen oınaýǵa umtylǵanmen, zagrebtik komanda myqty qarsylas degen mártebesin tekke arqalap júrmegenin kórsetti. Kezdesý aldyndaǵy sholýymyzda horvat klýbynyń Eýropa klýbtarynyń basty týrnırine osymen on jetinshi ret qatysyp otyrǵanyn, quramy da osal emes ekenin aıtqan bolatynbyz.
Sondyqtan komandalardyń kishigirim qateligi de qaýipti shabýyl uıymdastyrýǵa ákep soqtyrdy. Onyń ústine birinshi taımda qonaqtar birshama mazmundy oınap, keıde sátti kombınatsııalar jasap júrdi. Abyroı bolǵanda bizdiń jigitter qorǵanysta saýatty oınap, qaýipti shabýyldardyń betin qaıtaryp júrdi. Biraq, ókinishke qaraı 39-mınýtta «Astananyń» qorǵanys shebiniń sol qaptalyndaǵy qatelikten keıin zagrebtikter esep ashty. D. Olmo Dmıtrıı Shomkony aınalyp ótip, toǵyzynshy nómirdegi Marıo Býdımırge tamasha pas berip, qaqpashymen birge-bir shyǵardy. Ótkir shabýyl ótinde ábden ysylǵan Marıo múmkindikti múlt jibermedi.
Esepti teńestirý úshin elordalyq ujym bar kúshimen shabýyldady. Biraq 1-taımda onyń údesinen shyǵa alǵan joq.
Foto: www.fcastana.kz
