«Astana: ótkeni, búgini jáne bolashaǵy» kórmesi (FOTO)
ASTANA. QazAqparat - Qala turǵyndary men qonaqtary Astananyń ótkenimen, búginimen jáne bolashaǵymen tanysa alady. Osylaı atalatyn kórme Táýelsizdik saraıynda ótip jatyr, dep habarlady qalalyq ákimdiktiń baspasóz qyzmetinen.
Kórme zalynda túrli muraǵat qujattary, zattaı jáne jazba eskertkishteri bar. Ásel Mustafına, «Astana: ótkeni, búgini jáne bolashaǵy» kórmesin uıymdastyrý bóliminiń qyzmetkeri: - Munda Kemel Aqyshev jasaǵan Bozoq qalasynyń maketi qoıylǵan. Sonymen qatar, qorǵandar men qazba oryndarynda túsirilgen fotosýretter de bar. Bul ekspozıtsııada muraǵat qujattary, fotosýretter, Astanaǵa arnalǵan beınequjattar usynylǵan. Bıyl qala óziniń 17 jyldyǵyn toılaýda, osyǵan oraı kórme uıymdastyrýdy jón kórdik. Kelesi zalda elordanyń qazirgi damýyna baılanysty qujattar qoıylǵan: bas qalany Almatydan Astanaǵa kóshirgen kezdegi fotosýretter men qujattar. Sonymen qatar, bolashaqtaǵy Astana da kórsetilgen. Bir relsti joldar, kóp qabatty záýlim úıler. Munda 2050 jyldaǵy Esildiń sol jaǵalaýy beınelengen. Ár bir ýaqyttyń mádenı jáne arhıtektýralyq beınesi, ekonomıkalyq jáne áleýmettik damýy ár túrli, osynyń bári «Astana: ótkeni, búgini jáne bolashaǵy» atty kórmede kópshilik nazaryna usynylady. Ekspozıtsııanyń ereksheligi - eksponattardyń áralýandylyǵy, bul qonaqtarǵa tanymdyq ári qyzyqty ekskýrsııa júrgizýge múmkindik beredi.
