«Astana» óte myqty komanda jəne kez kelgen oıynshysy jeke kózge túse biledi - «Galatasaraı» bapkeri
ASTANA. QazAqparat - "Astana-Arena" stadıony búgin taǵy bir tarıhı matchqa kýə boldy. Qazaqstannyń fýtbol komandalary arasynda tuńǵysh ret ÝEFA Chempıondar Lıgasynyń toptyq kezeńine ótken "Astana" fýtbol klýby búgin osy toptyq kezeńde óz alańynda alǵashqy oıynyn ótkizdi. Túrkııanyń "Galatasaraı" komandasyn qabyldaǵan "Astana" 2:2 esebinde oıyn kórsetip, toptaǵy alǵashqy upaıyna ıe boldy.
"Galatasaraı" fýtbol komandasynyń bas bapkeri Hamza Hamzaoǵly "Astana" óte myqty komanda ekenin moıyndady.
"Rasymen, birinshi taımda biz óte jaqsy oınadyq. Biraq, ekinshi taımda "Astana" múlde basqasha oınaı bastady, al bizdiń oıynshylardyń yntasy joǵala bastaǵandaı. Bəlkim, fýtboshylarymyz sharshaı bastaǵan shyǵar. Men oıynshylardy almastyrdym, qorǵanysty kúsheıtip, qarymta shabýyl jasaýǵa shaqyrdym. Biraq, Astana da qarap otyrmaı, osy nətıjege qol jetkizdi", - deıdi H.Hamzaoǵly.
"Astana" - myqty komanda eken, toppen jaqsy oınap, jeke sportshylar da kózge túse biledi. "Astanadaǵy" biraz oıynshy kez kelgen eýropalyq komandalarda jəne Eýropa kýboktarynda oınaı alady" - dedi qazaq komandasynyń oıynyna baǵa bergen túrkııalyq bapker.
Aıta keteıik, ÝEFA Chempıondar Lıgasynyń "S" tobynda oınap jatqan "Astana" fýtbol klýby búgin óz alańynda birinshi matchyn ótkizip, "Galatasaraı" komandasymen teń tústi. Qorytyndy esep 2:2.
