Elorda ortalyq saıabaǵy halyqaralyq baıqaýda úzdik dep tanyldy
ASTANA. KAZINFORM – «Hrýstalnoe koleso» halyqaralyq baıqaýynda Astananyń ortalyq saıabaǵy eń úzdik ashyq oıyn-saýyq jáne demalys saıabaǵy dep tanyldy.
Elorda ákimdigi resmı saıtynyń habarlaýynsha, baıqaý Reseıdiń Sochı kýrortyndaǵy oıyn-saýyq jáne demalys ındýstrııasy mamandarynyń 33-shi forýmy aıasynda ótken. Astanalyq saıabaqtyń basty básekelesi Máskeý oıyn-saýyq saıabaǵy boldy.
«Biz bul is-sharaǵa maýsymnyń basynan beri daıyndaldyq. Elordamyzdy laıyqty tanystyrý úshin komandamyzben saıabaqta jańa, qyzyqty sheshimder men iske asyrylǵan ıdeıalar jetkilikti dep oıladyq», - dedi «MAGIC PARK ASTANA» Ortalyq saıabaǵynyń basqarýshy kompanııasynyń dırektory Gaını Hasenov.
Qazylar alqasy saıabaqty basqarýdyń 6 jylynda júzege asyrylǵan tujyrymdamalyq sheshimderdi baǵalady: oıyn-saýyq aımaqtaryn taqyryptaý; attraktsıondardy otbasylyq-balalar jáne ekstremaldy attraktsıondar aımaǵyna bólý; gastroalleıa.
Sondaı-aq olar saıabaqtyń ornalasqan jerin de atap ótti. Óıtkeni ádette saıabaqtar adamdar kóp jınalatyn jerlerde ornalasqan, al munda saıabaq kelýshilerdi ózine tartty.
Bıyl ortalyq saıabaqta jańa attraktsıondar «Jetinshi aspan» jáne «Ekstrım» úlken maıatnık qoldanysqa berildi. Biraq kelýshiler úshin eń qyzyqtysy saıabaqtyń jasyl aımaǵynda ótetin jáne Aqqý toǵanyna qaraıtyn bıik monorelsti jańa «Áýe saıahaty» attraktsıony boldy.
