Astana ortalyǵynda jylyna neshe marafon ótkizýge ruqsat beriledi

ASTANA. KAZINFORM — Elorda ákimi Jeńis Qasymbek Astanadaǵy sporttyq marafondardy ótkizý oryndary men merzimderi týraly tilshiler suraǵyna jaýap berdi.

— Túrkistan, D. Qonaev, Aqmeshit sekildi kóshelerge jaqyn ornalasqan úılerdiń turǵyndary únemi qarsylyǵyn bildiredi. Osyǵan baılanysty bizge kóptegen shaǵym túsip jatyr. Sondyqtan biz marafondardy ótkizýge qarsy emespiz, biraq marafon uıymdastyrýshylarymen birlesip ózge marshrýttardy usynýǵa tyrysamyz, — dep jaýap berdi ákim Ortalyq kommýnıkatsııalar qyzmetinde tilshi suraǵyna.

Elorda ákimi sporttyq is-sharalar ótkizetin oryndar jetkilikti ekenin aıtady.

— Bizde orman beldeýinde keremet velojol bar, aınalma jol boıyndaǵy baǵyttar da bar jáne taǵy basqa múmkindikter jetkilikti. Qala ortalyǵynda iri marafondardy ótkizýge qarsy emespiz jáne olardy ótkizemiz, alaıda mundaı sharalar ár apta saıyn ótpeýi tıis, — deıdi J. Qasymbek.

Onyń aıtýynsha, qala ortalyǵynda jylyna tórt iri marafondy ótkizýge bolady. Al qalǵan barlyq is-sharalardy Trıatlon parkinde, jaǵalaýda — avtokólik qozǵalysy joq jerlerde ótkizýge bolady.

Aıta keteıik, Astanada 170 qoǵamdyq keńistik abattandyryldy, 1,1 mln-nan astam aǵash egildi.